灣仔的士衝燈被巴士攔腰撞 的士上兩名乘客身亡

2024年1月14號晚9點半左右，灣仔菲林明道同港灣道交界發生一宗交通意外，涉及一架雙層巴士以及一架的士。

事發嗰陣，一架空載城巴12米版本丹尼士Enviro 500型雙層巴士（車隊編號：5528，車輛登記：PT9670），沿港灣道東行去到菲林明道交界，攔腰猛撼一架沿菲林明道北行載客的士左邊車身。由於撞擊力巨大，的士被打橫推前幾米之後先至停低，右邊兩條車胎被撞到爆胎。

由手提電話流動通訊軟件群組流傳嘅影片可以睇到，車禍發生後後的士被撞到變形，附近途人抬出的士入面嘅乘客即場進行急救。

現場消息指巴士上無人受傷，而的士上面有一名女司機以及一男一女乘客，三人都喺車禍發生後受傷，救援人員迅速趕到現場協助，並且將兩名的士乘客用救護車送院搶救，可惜年約四十幾歲嘅女乘客送到去律敦治醫院嘅時候已經證實傷重不治，至於五十幾歲嘅男乘客就送咗去瑪麗醫院，其後亦因為傷勢嚴重返魂乏術。

至於巴士以及的士兩名司機都喺現場接受警方調查，警方暫時會循有司機衝紅燈導致意外嘅方向調查，並且呼籲市民如果目擊今次車禍應該盡快向港島交通意外調查隊聯絡。

根據網上流傳嘅行車記錄儀影片，明顯睇到今次係的士司機衝燈導致車禍發生。