黎兆聰：政府偏袒鐵路扼殺巴士！家陣你先至知呀?!

兩間專利巴士公司申請加價，當然地例牌有政客出嚟大叫「反對加價，避免加重市民負擔」。而_{1967年暴動掟汽油彈暴徒組織}工聯會轄下嘅「汽總」巴士分會骨幹黎兆聰日前接受傳媒訪問直指，政府偏袒鐵路，扼殺行業生存空間「巴士公司利潤減少緣於鐵路發展和政府要求巴士路線減班甚至取消」

喂阿哥，呢啲對白咁熟口熟面嘅?! 聽講小弟噏咗起碼十年過外，你家陣先出嚟跟口水尾，會唔會遲咗少少呢。

而由「鐵路通車，政府要巴士公司減班到殺線」呢個現實，再加埋一大堆唔講唔覺講開好覺嘅宏觀條件，形同全方位要市民「除了鐵路以外你們不可以有別的交通工具」，再衍生出「拜鐵路教」呢樣東西，好多人認為係小弟嘅偏執、甚至乎係偏激之詞。如今黎兆聰直言「認為削減班次和路線正正是政府偏袒鐵路發展，當沿線有鐵路就希望巴士線減班，『逼市民坐鐵路』」，豈不「見證」呢個宗教係幾咁真實的存在於香港！

新鐵路線通車，然後運輸署「殺線」，可謂由地鐵將軍澳線通車開始「殺紅了眼」就總之「有殺無賠」。連同觀塘線延至黃埔所發生嘅事，包括運輸署嘅所作所為，同當區居民嘅反應，我唔花篇幅去講，大家有興趣就摷返昔日嘅文章。再到南港島線及港島線西延，發生嘅「劇情」依樣葫蘆，總之巴士、專線小巴要減班，居民堅信拜鐵路教聖訓「搭鐵唔會塞車」而一窩蜂做晒「拜鐵路教」信徒，就係真真實實的發生。

即使到「東鐵」延長至港島，加諸於西鐵變成屯馬線，昔日紅隧巴士站人車大排長景象消失得無影無蹤，一定程度上係鐵路沿線居民「用腳投票」嘅結果，但我想問，若是要前往灣仔道近集成中心，或是北角嘅「香港大酒店」，明明有101、111，106、116 去到門口咁滯，你唔L係會同我講「搭港鐵出嚟行幾步路好方便」呀嘛。但我實實在在的告訴你們，我真係有聽過類似嘅說話 – 我話 300 隧巴被取消後，英皇集團中心附近無車直過旺角、油麻地，有人真係講「行返去修頓搭港鐵咪得囉」。

正所謂一隻手掌拍唔響，要不是市民盲信「搭地下鐵路，話咁快就到」，政府又豈能對巴士「殺個片甲不留」。或是掉返轉，一切對非鐵路嘅公共交通的負面之言，有幾多人係不加思索就嵌入心扉，然後就對巴士綠VAN被殺「視若無睹」，然後促成此局。

黎兆聰另指唔少路線晚上收車大法好，半個鐘一班先至搭得到「當市民發現巴士路線班次疏落，就會轉投較頻密的鐵路服務，無形中使市民覺得巴士公司未能有效提供服務」，佢講嘅現象確係事實，但唔止係19:00 後，就算係日間 10:00 – 16:00，好多路線嘅班次一樣疏落。但另一方面，早晚繁忙時間唔少路線依然「頂閘」，理論上應該加車，但點解一直加唔到，焗住响政府一邊廂宣揚「安全帶是萬能的」要巴士乘客帶安全帶但另一邊廂繼續要乘客由屯門公路轉車站企到出長沙灣、甚至黃大仙廟，或是聯和墟開始沿粉嶺公路至吐露港公路一直企到過咗獅子山隧道。好多人都因而想問「點解巴士公司唔加班」。或者先睇吓下面呢張相片

是咁的，運輸署有指引，若載客量達到85% 先至可以申請加班，但係同大家計一條數：
1. 54÷6×4=36
2. 59+25+36=120
3. 120÷138×100%=86.9%
4. 138×85%=117
5. 117-59-25=33

即係點？根據《道路交通 (車輛構造及保養) 規例》(Cap. 347A) 第73條，巴士可容納企位人數為每平方米 x0.17。簡單講，即係每平方米企 6個人。過去有民間人士組織指出呢個標準根本唔現實，倡議應該修例至每平方米企4個人。第1, 2條算式即係假設「6」改「4」之後的核准載客量。然後的，第3條就是假設新標準「企滿」相對於現行標準的載客量會是86.9%。第4及5條就係以現有的標準，推算返「85%載客量」，要企夠33人先至達到可以加班嘅標準。但請問就算乘客唔係堆晒响中門前面，可以企到33個咩？然後嘅答案咪就係「想加車，發夢啦你！」亦某程度上，撇除「由治入興」嘅因素，也許可以解釋到點解運輸署一直唔進行呢項嘅修改。

好吧，早晚繁忙時間迫到咁，乘客自不然對巴士心存厭惡感。然後的，人性之本質「有得揀就唔L搭巴士」。連埋黎兆聰講嘅夜間時份「想搭都有排等」，請問當政府宣佈要興建新鐵路線嘅時候，有邊個唔會拍爛手掌，再然後就有政客之流起勢催促「快啲起，起快啲，唔好等，最好聽日落成通車」。最好起到下面呢張唔知仲有幾多人記得嘅地圖咁。但總之一條新鐵路線通咗車之後，唔係殺線就減班，再然後，繼續無限LOOP 囉。

有啲嘢到底係我偏執的一面之詞，還是有些人一味逃避現實，留待各位各倌自辨。總之一句講晒，黎兆聰講嘅嘢，我真係老L早就講到口臭。但又要講，唔知點解，無人話黎生佢偏激嘅喂?? 或許要貼返呢張相出嚟自我安慰一吓吧