【新加坡特約 Oscar Ong 報導】由新加坡陸路交通局 (Land Transport Authority – LTA) 及國際公共運輸協會 (Union Internationale des Transports Publics – UITP) 聯合舉辦嘅新加坡國際交通研討會及展覽 2024 (SITCE 2024)，响11月6至8日假座新加坡會展中心舉行。是屆主題為 “Smarter Journeys for Sustainable Cities”，近4000個參展商參與，當中包括多間巴士製造商，展出嘅車輛當然係電動巴士。其中來自中国嘅比亞迪 (BYD)、中通客車 (Zhongtong) 及由馬來西亞 Gemilang 建造車身嘅中国中车 (CRRC) 雙層巴士，可謂展覽嘅焦點所在。
比亞迪嘅B12DS 車身由珠海廣通客車設計及建造，款式可謂相當趣緻。上下層車廂嘅照明採用暖白色，連同地板鋪設紅木紋物料，予人較暖和嘅感覺。
值得一提冷氣嘅蒸發器並非一如傳統的一體式機組置於上下層的車尾，而係安裝於冷氣槽側，仿如好多年前香港嘅旅遊巴士的佈局，或是最早期的 Dennis Dragon 冷氣雙層巴士的下層車廂。也許是為了遷就新加坡LTA要求的「三門雙梯」設計而致。雖然觀感上算不上局促，但進出乘客座位還是要稍加留意，避免撼頭。
中通嘅N12D 外型上相比可能稍為遜色，但廠方強調其續航距離逾600km，乃三家廠商出品中最強。
車廂佈局亦偏向傳統保守。冷氣蒸發器同樣安裝於冷氣槽。可能因為冷氣槽組件的設計，整體並沒有如比亞迪的凸冗，進出座位可無需特別留意。不過上層左邊中前段的地台高出一級，高低差約6cm。唔止感覺古怪，試坐嘅感覺亦較差。觀察車身良久亦似乎找不出原因，但在於乘客角度，的確希望廠方能夠將之消失。
中車嘅eD12，車身由香港方面都認識的馬來西亞順豐客車 (Gemilang) 設計及建造。由於會場內角度所限，鳴謝 Mark Chua – (buses[IN]gapore!) 提供於場外拍攝嘅相片。
外觀與月前「路經香港」的紐西蘭版本近乎相同，最主要的分別當然係「坡式三門雙梯」
(即係點？留意本台動態吧)
至於車廂佈局，前梯用上綠色氣氛燈，配合暖白梯級燈，可謂營造出一份驚艷的感覺。最重要的是沒感到刺眼唔舒服，Gemilang 設計師嘅大膽做法應記一功。
更特別之處係上層前梯後共設有三組「會議座」，不止是裝設倒頭位，更安裝有餐枱。未知這是 LTA 要求的新設計抑或測試，還是 Gemilang 精心安排作出示範。但最尾一排置於一級梯級之上，雖然進出未有感到不便，但相比另外兩部都是平面，還是需要注意的。
Be the first to comment