相信唔少觀眾、讀者朋友一直都會認為我哋因為各種嘅原因一定唔會測試介紹 Toyota Coaster，或是更直接的講「唔會借到車返嚟拍攝」。不過，所謂世事無絕對，又而且要安排車輛有 other than 透過代理嘅途徑。今次幸運地得到三間旅遊巴公司鼎力支持，唔止打破冚世界以為嘅必然，仲要「一炮三響」一次過嚟三架兩個代目嘅豐田Coaster，分別係ABC旅運有限公司嘅 Euro 4 私家小巴 XZB50，豐裕旅遊車服務有限公司嘅 Euro 5 28座 XZB59 及 曉晨旅運服務有限公司 最新一代 Euro 6 27座 XZB80。
Euro 4 XZB50 (ABC旅運有限公司)，Euro 5 XZB59 (豐裕旅遊車服務有限公司)，最新一代 Euro 6 XZB80 (曉晨旅運服務有限公司)
或者好多人嘅即時反應認為我哋只會將 Coaster 車系踩到「賤過地底泥」，但係由製作籌備開始，Uncle Lim 就同三間旅遊巴公司負責人「人頭擔保」一切以車論車，甚至可能會「有驚喜」。
雖然三位老闆首肯安排車輛而都話「你哋講乜都無所謂」，亦在拍攝當日「打爆油缸」先至連人帶車去到約定匯合地點。但就係「連人帶車」，即係…..😏😏
事實上，回顧返我哋過去嘅節目或文章，即使 up to now 我哋出過最多集數嘅車款三菱 Rosa，不足之處都實話實說，尤其是例如早前上架嘅《全新 三菱 Mitsubishi Fuso Rosa (BE7仕様) 》，Uncle Lim 搜集大量資料對佢老早就睇極唔順眼嘅車頭線條設計「開行火力」狂踩猛踩，都充份證明我哋或是 Lim 叔叔佢本尊評鑑車輛確係照事論事，絕無偏幫或針對某個牌子、車款。
「判官」讚口不絕，但 Lim 叔叔就極度睇唔順眼
好吧，總算萬事俱備，但係三架車，「判官」同 Uncle Lim 兩個人揸唔晒㗎，但大家唔好唔記得仲有曾經响《MAN ND363F Gemilang Lion’s City DD 11.7米 雙層巴士》亮過相嘅攝影師「電影佬」阿 Kris 先得㗎！作為豐田私家車車主嘅佢，對住配備嘅自動波箱乃30年前嘅出品嘅版本，可能會感到好稱心滿意，但佢都知道揸緊嘅係一部小巴！
至於一直對豐田呢個牌子多多意見嘅 Uncle Lim 會點樣「以車論車」？揸返佢由入行揸旅遊巴就揸慣嘅上一代「B59仕様」棍波版本，勾返起佢「想當年」嘅回憶，由Euro 3 規格嘅駕駛操控表現開始，唔「踩」的話又會帶出乜嘢資訊出嚟？
而且佢仲翻箱倒籠、online searching 搜集大量歷史資料，抒發佢對 Coaster 車系嘅認識同真正見解，加上佢對最新一代嘅 B70/B80 仕様嘅睇法，尤其是關於車身結構方面嘅評鑑，各位恐怕要食驚風散、降血壓藥、含脷底丸！
Photo credit: Steve Guess
至於「判官」，其實係最老實不客氣咁「搶奪」最新款嘅 B80 仕様做 Test drive。而從來對豐田呢個牌子「少出聲」，兼夾大巴、小巴、雙層巴都揸過晒嘅佢去測試評鑑豐田車廠嘅最新小巴出品，仲要係本港市場最新配置嘅六前速自動波嘅規格，應該夠晒客觀公平喇啩！
到底三位主持對呢三部豐田中小型巴士以至整個 Coaster 車系嘅評價係點？觀眾們不妨將太多「太深入民心」嘅睇法、誤解，先行擺埋一邊，更唔好做任何前設。 總之，不厭其煩嘅講多一次 ── 如果你認為只會全力負評，麻煩你準備去幫襯眼鏡舖！(香港經典俗諺「跌爛眼鏡」- 意即錯誤觀察及判斷)
全集影片，已經上載到 HK Bus Channel 的 YouTube 頻道。
唔好話唔提你，記得由頭睇到尾，有彩蛋等住你！ Tips: 三位老闆「連人帶車」嘛….
睇完記得點擊 訂閱，與及「撳鐘仔」以便可以隨時知道有新影片上架。
尊尚特選商號：
JoJoBUS
特選商號：
康和旅運有限公司
曉晨旅運服務有限公司
CALL4VAN
ABC旅運有限公司
豐裕旅遊車服務有限公司
華記膠輪電池公司
特別鳴謝：
豐裕旅遊車服務有限公司 – Francis Yeung
ABC旅運有限公司 – Martin Lau
曉晨旅運服務有限公司 – King H.T. Chan
(排名不分先後)
資料相片/影片：
Jacky Lim, Gary Chan @HKcoach.info, Richard Cripps, Steve Guess, Terence Tse,
Steven Cho @Australia Correspondence
主持： Jackey Law, Jacky Lim, Kris Ip
攝影及工程： Ian Chan, Kris Ip, Hung Lun Bear
編導及後期製作： Jacky Lim
執行編導：Kris Ip
監製： Jackey Law
3 Trackbacks / Pingbacks