新城巴車身色彩最後2強出爐 「都話咗係內定㗎啦」？！

話說之前講到，除咗更新企業品牌形象，城巴仲決定會為旗下車隊所有巴士更新車身塗裝。城巴自1979年喺香港提供公共巴士服務，巴士車身嘅塗裝一直以黃色為主調，為咗樹立全新嘅企業形象，公司設計咗5款新嘅巴士車身塗裝設計，概念分別源自保留城巴經典嘅黃色、以及早前推廣零排放轉型計劃「#MissionZero」嘅特別「拉花」設計。

為咗畀公眾更加清楚了解到呢5款新巴士車身塗裝設計，城巴安排咗5架巴士各自披上1款新巴士車身塗裝設計，安排喺中環海濱活動空間舉行「中環夏誌2023」活動當中嘅「One Citybus」展覽中向公眾展示。

城巴新巴即將合併 5款新城巴車身色彩 「中環夏誌」中展出 全港市民可以上網投票篩選

雖然普羅大眾都知道呢類更新企業形象都係公司內部決定，不過城巴都做樣比公眾有投票選擇嘅機會：

公眾可以喺2023年6月9~18號期間，上去城巴特別設立嘅網站投票選擇心儀嘅新巴士車身塗裝設計，公眾投票之中得票最高嘅2款會進入第2輪投票，喺2023年6月20~27號期間再由城巴員工投票揀出最終結果。

之前都有傳過類似城巴試驗緊嘅電動巴士嗰款車身塗裝都有機會係最後兩強…但…

時間嚟到2023年6月20號，城巴發出新聞稿表示之前嘅公眾投票，5款新巴士車身塗裝設計，以編號4、5得票最高，分別有23.9%以及35.7%嘅投票市民支持，可以晉身內部員工投票階段。

之前會場所見，4號以及5號都係全車身噴油，其餘嘅1號、2號以及3號車身就只係「包膠」，參觀者之間盛傳其實城巴早就已經有內部欽點：「4號以及5號作為最終候選嘅新車身色彩」云云。

係咪真係內定㗎？

大家睇見完善咗嘅區議會同立法會選舉都知咩事㗎啦！

至於員工內部投票之後，城巴將會安排喺專營權合併生效嗰日——即係2023年7月1號——正式公佈獲選嘅新巴士車身塗裝設計，亦會以高效率嘅方式為旗下大約700架巴士換上呢個新嘅車身塗裝。

講起全民公投去決定巴士公司車身塗裝，就不得不提2016年，喺新加坡嘅「SG❤️BUS」新巴士營運模式下，由新加坡市民投票選出往後巴士車身顏色。雖然市民以及輿論都大比數支持以紅色（Bright Red）作為新模式下巴士車隊顏色，但根據當時公佈投票結果，青綠色（Lush Green）最後喺57000票入面，以144票之微稍勝於紅色，成為現時新加坡公共巴士主要顏色。

喺美麗新香港下，大家都相信投票係絕對公平公正嘅！無論係點，有份投票嘅市民，都利用咗佢哋寶貴嘅投票權，喺互聯網上面作出咗自己嘅選擇。展望嚟緊7月新、城兩巴合併後，由員工選出嚟最終塗裝設計，可以盡快喺馬路上出現，為香港嘅公共交通史再次打開全新一頁。

大家都係造馬，借鏡新加坡嘛！

呢5架披上候選車身塗裝嘅巴士，會安排喺專營權合併前服務市民。嚟緊嘅「One Citybus」展覽亦將會更換展品…大家可以拭目以待。

中環夏誌 Central Harbourfront SummerFest 2023

開放日期：2023年6月9號到7月23號
星期一至五 15時 ~ 21時
星期六、日及公眾假期 13時 ~ 21時
開放時間因應當日舉行嘅特別節目而更改。請留意特別節目時間表。

地址：中環龍和道9號 中環海濱活動空間 Central Harbourfront Event Space