ISUZU 全新巴士車系推介會及展覽

香港過去三年受到2019新型冠狀病毒病（又稱：「武漢肺炎」）的蹂躪，整體經濟深受打擊，各行各業苦不堪言，面對政府採取極度嚴格的防疫措施，旅遊業當然全面倒塌，再加上大部份時間學校均停止面授課堂，旅遊巴士行業近乎全軍覆沒。但係，所謂嘅「疫情」總有過去嘅一日，加上「解封」之風聲漸趨響亮，而大量旅遊巴士荒廢於葵涌貨櫃碼頭嘅停車場入面，飽經三年嘅風吹雨打有幾多可以再次投入服務都成問題。因此各代理、同本地各車身廠其實早已默默地為即將嘅「解封」做好充份嘅準備。其中早已成為旅遊巴 (底盤) 牛耳嘅日本牌子 ISUZU 五十鈴，本港代理合眾汽車於日前假座沙田會所1號水中天舉辦車展，及新車推介會，向旅遊巴業界介紹及講解來年重點新車。

大型巴士 LV452 / LT434

會場空地共展出五部全新款巴士，包括兩部採用 LV452 底盤、由捷聯車身廠裝嵌 JL-020 車身嘅旅遊巴。兩部巴士均為全長12m 規格。其中一部採用本地學童巴士（校巴）或居民巴士（邨巴）慣用的3+2座位佈局，總載客量65座。

另一部則為豪華巴士或過境巴士常用的2+2佈局，而且右邊車身設有中門。正正就係『過境巴士』常見的標準設備。

捷聯貴為本港首家提供長度12米車身安裝上14排座椅 (3+2佈局70座；2+2佈局57座) 嘅本地車身廠，為何這款 ISUZU 新車卻只有65座 (13排) 呢？原因就是 LV452 底盤所採用的為同廠縱置直列六氣缸，排氣量高逾15,000cc的 ISUZU 6WG1 Euro 6 引擎，碩大嘅機體加上散熱空間要求及冷卻水箱佈局，令車尾縱向逾1.0米嘅車廂地台高得無法按照香港法例要求佈置座椅。

引擎倉體積龐大，令到車尾留有如此巨大空間豈不是形同浪費？理論上確實如此，但香港目前法例下單層巴士高度上限仍是3500mm，根據過往慣例極其量只可以基於公眾利益向政府申請 exemption（豁免許可證）將車身高度可放寬至總高 3700mm 。言下之意，「浪費」了的車廂空間也不是 ISUZU 或車身廠想的。而話說回來 ISUZU 類近機械規格的車款就是 GALA 車系；响日本本土市場有 “SHD” 型號，連頂置冷氣總高3800mm規格。或是相同型號底盤於中南美洲市場銷售，當地法例限定車身總高亦達到3800mm。希望香港政府可以重善如流，修訂單層巴士之法定車身上限至3800mm。

會場展出的第三部大型旅遊巴士，採用的底盤就是 ISUZU 於香港市場的「長青樹」LT系列的 LT434。車身由亞洲車身廠設計及監督建造最新款 ASIA VERO II 車身。

ASIA VERO II 為運輸署於早前運用行政手段放寬所有巴士車身闊度至2550mm 後的第一款旅遊巴士車身。展出的樣板車為65座位規格。但據亞洲車身廠方面透露，早前進行過測試，確定 ASIA VERO II 車身亦可以裝設70座位規格。

但順帶一提，ASIA VERO 車身並非停產，客戶仍可按其需要或喜好選擇採用。

加入中型巴士「戰團」 NPR75

一直以嚟中型巴士不論响香港抑或世界各地嘅選擇都只有豐田 Coaster 再唔係咁三菱 Rosa (日產 Civilian 於2020年底停產，香港更早於2001年石油氣版試驗完之後絕跡香港)。而豐田集團因日本政府揭發引擎測試報告數據做假事件被罰緊停賽，預計最起碼係2023年第一季度先至有可能恢復生產。中型巴士市場頓時出現一定嘅真空，合眾汽車當然要把握時機，夥拍捷聯車身廠推出全新設計嘅 JL-021車身配以NPR75底盤建造的中型巴士以供選擇。

會場展出的兩部樣板車，總長度均為8.1米的規格。其一部於車尾裝設有輪椅升降台，其最高載客量為27人+1輪椅位置；另一部則為「普通版」，最高載客量可達31人。

根據代理發放嘅資料NPR75中型巴士尚有7.1米長度選擇其最高載客量為23人，同時7.1米車型亦一如Coaster 或 Rosa 一樣可選裝19座位成為一輛小巴，除正常規格外NPR75中型巴士均可自由選配座位及輪椅數量嘅組合，同時輪椅升降台位置可根據客戶需求改裝於左側車身。因此NPR75中型巴士可謂一款百變嘅車種。

雖然 Isuzu 能否成功突圍還有待時間觀察，不過 Isuzu 絕非同類車型嘅「新丁」，事關過去 Isuzu 有其自家小巴/中型巴士 Journey 車系，更是廠方編號 BLD20 仕様而命名為 ELF 嘅型號，曾是香港公共小巴嘅主力車款之一。

又講返轉頭一定總會有人執拗於「貨車陣」巴士嘅問題，其實本台曾在其他節目/文章多次指出「底盤無分載貨定載人」。因此合眾汽車高級營業經理彭楚源先生於簡介會上特別指出，作為客車用途而生產嘅 NPR75 底盤與貨車規格有兩處分別：
– 前後懸掛雖維持葉片彈簧，但為用於客車的「軟式彈弓片」
– 前軸換上闊輪距 (Thread / track width) 規格，為五十鈴廠方特意為客車用途設計

類似這種以「貨車車陣」裝配以客車車身嘅做法早已在台灣、印尼實行好多年，亦受到當地市場歡迎。以之對比，合眾汽車為進軍香港中型巴士市場做嘅準備功夫似乎來得更加充足。

但無論如何 ISUZU 悠久以來响香港運輸行業嘅口碑，呢款小巴/中型巴士嘅推出無論對經營者或一般市民乘客，算係值得期待嘅車款，最起碼俾市場有多一個選擇。