【臺灣】桃園列車入站冒煙起火 所幸今次無人命傷亡

臺灣喺2021年4月2號發生工程車跌入路軌，令「太魯閣號」列車未及煞車而撞毀，引致50人死亡後，臺鐵連日成為臺灣當地傳媒焦點，而事發9日後，臺鐵又發生令乘客擔憂嘅事故。

【臺灣】太魯閣列車出軌 死傷上百人

2021年4月11號1809時，臺鐵旗下由斗南開往七堵嘅126車次「EMU300」型「自強號」列車駛入桃園中壢車站第一月台，並且喺1811時停定。

然而，列車組第3車「EMC307號」第1軸海側疑似鬆軔不良，到1814時列車底部冒出濃濃白煙同火光，站務人員立即報警。

桃園市消防局未敢怠慢，即時派出8架消防車、2架救護車、27名救援人員趕去中壢車站，拖喉滅火，火勢15分鐘內撲熄，消防其後射水降溫。今次所幸無人傷亡，財物損失則有待查證。

臺鐵回應傳媒查詢時表示，「EMU300」型係老舊車輛，車齡已經超過30年（編按：1989年投入服務），故障率較高，臺鐵已經列咗佢做優先汰換車輛。

中壢車站副站長賴欣民表示，仲評估緊受影響嘅車次，暫時採用單線運轉方式，南下、北上互相用空檔開車，南下開一班北上再開一班，相互交替。