九巴88歲生日快樂！

話說雖然「九龍汽車有限公司」嘅歷史係可以追溯返去1921年，但正式營運香港專營巴士服務嗰間「九巴」係叫「九龍汽車（一九三三）有限公司」。

時間返去1932年，香港政府重整香港公共交通服務，將香港公共巴士服務以專營權管理，並以「香港島」、「九龍 + 新界」分成2個專營權，後者喺當年5月批咗畀「九龍汽車」。

到咗1933年4月13號，鄧肇堅、雷瑞德、雷亮、譚煥堂、吳海霖、林明勳等人確立拎到專營權之後嘅「九龍汽車」公司架構，同時兼併埋南興巴士公司、泉興巴士公司、長美巴士公司，成立「九龍汽車（一九三三）有限公司」，同年6月11號開始營運新嘅公共巴士專營權，接辦當時中華汽車、啟德巴士公司經營嘅合共18條九龍及新界路線。

所以嚟到2021年4月13號，「九巴」就正式88歲喇！大家有乜想同佢「老人家」講吓呢？