城巴喺1979年開始提供服務，憑住創新嘅思維同優質嘅服務，成功由當年只得1架艾莎富豪B55型雙層巴士，至今發展到有超過1700架巴士嘅車隊以及超過5000人嘅團隊，服務範圍覆蓋港九新界，每日接載乘客過百萬人次，期間城巴黃色嘅車身造就咗一個香港繁華輝煌時代嘅象徵。
城巴：香港開篷巴士服務始祖
城巴係最早喺香港長時間提供開篷巴士服務，早喺1979年已經由英國般尼茅夫 Bournemouth Corporation引入2架二手丹拿珍寶（車隊編號：D1、D2），呢2架開篷巴士特別之處在於佢哋係可變換式開篷巴士，車頂連同上層車窗可以利用車頂側邊嘅特設掛勾，用吊車吊走，變身成為開篷巴士；之後巴士車頂亦可以重新裝回，回復為普通巴士。
城巴推出開篷巴士服務後深受乘客歡迎，於是喺1981年將當年同D1以及D2一齊買返嚟嘅丹拿珍寶（車隊編號：D3~D6），一炮過改裝成永久式開篷巴士。之後城巴開篷巴士業務有所拓展，需要安排改裝多架開篷巴士，為海洋公園、山頂纜車、城巴旅遊以及不同旅行社等提供開篷觀光巴士服務。
自從2023年城巴、新巴兩個專營權合併，城巴係香港現時唯一營辦開篷巴士服務嘅專營公司，目前有6架開篷巴士服務公眾：
- 其中3架係2020年由新巴正在服役、配歐盟五期引擎嘅12米版本Enviro500型雙層空調巴士（車隊編號：5550~5552）改裝而成；
- 另外3架就喺2024年由城巴現役配歐盟五型引擎嘅12米版本Enviro500 MMC型雙層空調巴士（車隊編號：8358~8360）改裝而成。
呢批開篷巴士嘅下層都保留咗空調車廂，主要行走「人力車觀光巴士」路線。
城巴45載 開篷巴士「遊歷派對」
2023年中，隨著新巴行將併入城巴，當時「人力車觀光巴士」曾經搞過1條主打「再見新巴」嘅H1B號路線。時隔一年，城巴為咗慶祝 殲滅新巴1周年 城巴服務香港人45年，特別推出以「遊歷派對」為主題嘅特別開篷巴士觀光路線：
- 由中環天星碼頭開出嘅H1©號路線
- 由尖沙咀漢口道開出嘅H2©號路線
呢2條屬於H1號路線以及H2號路線嘅特別班次，會喺2024年7月12號到2024年8月11號期間嘅特定時間內行駛，每小時一班，每個單向路程收費港幣41.80元。
呢2條路線沿途設有多個巴士站可以畀乘客落車，當中有啲仲係鄰近同城巴發跡有關嘅地點。
呢次推出嘅特別路線其中一個重點巴士站會係「華富（南）」巴士總站——城巴早前邀請咗香港本地塗鴉藝術家何文蕙「阿包（Bao)」為「華富（南）」巴士總站嘅站長室設計同製作壁畫，當中當然唔少得當年城巴經典嘅「Network 26新里程」標語同埋由新加坡搜購返嚟嘅「黃老太」雙層巴士，為「華富（南）」巴士總站 抹去新巴印記 增添色彩！
為咗隆重其事，城巴呢一次仲特別安排咗其中兩架開篷巴士會披上特別嘅「遊歷派對」主題全車身「拉花」，另外有2款「遊歷派對」特別紀念車票已經喺城巴eShop購物平台向公眾發售。
大家見到呢個特別嘅「拉花」設計巴士，係咪好想影低佢呢？咁大家就要留意下呢次特別班次嘅走線喇！
H1©號路線詳細走線：
H2©號路線詳細走線：
各位巴士迷如果想拍攝嗰啲配有特色「拉花」嘅開篷巴士，記得遵守秩序注意安全喇！
Be the first to comment