號稱「為慶祝Cinnamoroll榮登2024 Sanrio character ranking香港區冠軍寶座」，Sanrio Hong Kong搞咗一個叫「Cinnamoroll夢之列車」嘅活動，安排喺2024年9月28號用上香港電車嘅#128電車做「Cinnamoroll主題電車」，沿港島北岸電車路喺屈地街到銅鑼灣之間鬧市中一來一回巡遊，原定1000時由屈地街電車廠出發，1100時由銅鑼灣總站返轉頭。
主辦方 Sanrio Hong Kong 一早公布巡遊期間Cinnamoroll會喺1035~1100時主題電車行經金鐘到銅鑼灣總站路段時「親自現身」向粉絲謝票，仲講到邀請公眾要喺呢段電車巡遊路線一齊見證呢個特別時刻。
結果呢次活動表面上好似好歡樂，實際上就係令唔少人失望而回…
首先，有唔少市民帶埋小朋友想見證主題電車由屈地街電車廠開出，但主辦方自己時間控制得唔好，朝早9點到尾先至搞到主題電車上嘅裝飾…
主題電車最終延遲超過20分鐘先至可以由屈地街電車廠起步…
主辦方仲要喺網絡社交媒體嘅官方專頁限時動態謊報係路面情況問題，而實際當時電車軌係路路暢通，呢度已經令一班守候喺電車廠門口嘅小朋友大感不悅：
點解Cinnamoroll要講大話？
其次，有一批市民查詢過金鐘路段即係指邊度，得到公關人員指出Cinnamoroll由力寶中心開始會出現，於是帶埋小朋友去到太古廣場對開等候——因為呢段係沿路電車軌最開揚嘅一段——結果Cinnamoroll未有如期喺主題電車現身。
失望嘅小朋友直接問：
點解Cinnamoroll要講大話？
更甚嘅係，主辦方似乎唔認識Cinnamoroll咁…主題電車上嘅Cinnamoroll個頭只係去到電車條圍欄咁上下高，但主辦方完全無視呢個高度比例，夾硬將電車圍欄綁滿氣球，由巡遊路線兩旁望就會見到…
氣球完美咁遮實晒Cinnamoroll個樣
結果唔少一早帶埋小朋友守候喺銅鑼灣巡遊路線兩邊嘅市民都話：
大人都完全睇唔到Cinnamoroll個樣
何況係小朋友？
主辦方嘅失誤，連番令小朋友感到失望，街道上有唔少小朋友發覺等咗咁耐結果係…
啲波波令佢哋睇唔到Cinnamoroll
有唔少小朋友係失望到「喊得好大聲」甚至掟帶喺身嘅Cinnamoroll落地踩嚟洩憤——滿街大喊嘅小朋友唔單止令家長手忙腳亂，仲搞到要其他途人一齊幫手𠱁返啲小朋友。
有路過嘅市民得知事件後對一眾小朋友嘅遭遇大感不值，直言
邊會安排得咁戇居？
路過嘅市民更有直接指主辦方係有心故意咁做：
點解要呃小朋友？
根本只係想討好啲錢
拎大家啲小朋友嚟玩（戲弄）
不X知所謂
不過大家可以放心，主辦方只會繼續向日本總公司話「香港人好支持佢哋」。
Be the first to comment