九巴「遊•九龍」觀光線　9月21日投入服務

自疫情過後，香港旅遊業生態亦都從過往倚賴歐美長途旅客，漸漸變成以中国大陸遊客為主導。

而每年10月1號中国國慶黃金週都係大陸旅客到訪嘅高峰期。嚟緊將會係疫後社會復常嘅第二過中国國慶黃金週，唔少旅遊相關行業都對嚟緊10月頭嘅旅客高峰期摩拳擦掌。作為香港公共交通運輸龍頭嘅九巴亦都唔例外。

九巴將會由9月21號起推出全新「遊·九龍」旅遊路線HK1，為訪港旅客提供全新嘅旅遊體驗。HK1路線將會由每日朝早10點開始，每30分鐘一班車，以循環線形式由尖沙咀碼頭出發，途經西九文化區、佐敦、油麻地、旺角、太子、深水埗、黃大仙，以及九龍城，然後返回尖沙咀碼頭，全程一共遊走九龍區17個唔同站點，沿途連接M+、香港故宮文化博物館、廟街、油麻地警署、女人街、花墟、美荷樓、黃大仙寺，以及九龍寨城公園等等著名景點。

HK1路線全程收費$19 ，旅客亦可以透過九巴手機應用程式App1933或者指定銷售點購買「旅客日票」，每張$55 ，日票乘客只需要於啟動日票後，上車時喺巴士收費器掃描車票上二維碼，就可以於二十四小時內無限次乘搭HK1觀光路線。

而喺用車方面，「遊·九龍」旅遊路線HK1雖然未有一如本港其他旅遊觀光路線，採用開篷巴士提供服務，但係亦都將會採用富豪B8L豪華巴士行走，車身配以粉紅色為主，標注有「遊·九龍 Tour @ Kowloon」字眼嘅全車身廣告，格外搶眼醒目。車內沿用豪華巴士嘅特闊座椅，腿部空間充足，車上並且設有無線Wi-Fi上網、USB充電，以及遮光窗簾，全車不設企位比乘客可以舒適感享受旅程。以報站系統亦都特別為新路線作出改動，除咗先以普通話作出報站外，亦會提供英文及廣東話報站。已報站內容亦都加入景點介紹。而車廂內亦都有二維碼貼紙，乘客可以掃描二維碼，閱讀介紹景點資訊嘅電子書，沿途令旅客可以了解不同景點嘅特色。