中港車身廠 x 威馳騰「全承載結構」旅遊巴新車發佈會

本港經濟大環境與及生產人手不足嘅宏觀條件之下，過去幾年堅持 香港製造（Made in Hong Kong） 嘅 中港車身廠 亦終於再度將部份生產工序北移，不過相對多年前的安排，「中港」今次來得更大刀闊斧。夥拍嘅對象為具備更強研究與開發（R&D） 實力嘅 威馳騰（福建）汽車有限公司，更是除咗裝嵌車身之外，更合作設計出「全承載結構」Monocoque 旅遊巴士，首批三部出品早前運抵香港，噚日 (9月28日) 响 中港車身廠 位於元朗新田廠房內舉行盛大嘅發佈會及交車儀式，近 200 位旅遊巴業界人士出席參觀。

「中港」董事總經理吳家榮先生 （下圖）响發佈會典禮上致辭時指出，明白旅遊巴業界於本港目前經濟狀況需要尋求減省開支的方法，當購置新車是必須之下定當希望有價格更相宜但質素、可靠性保持相當水平嘅選擇。幾經與「威馳騰」商討後，決定合作研發「全承載結構」車款，以滿足旅遊巴業界嘅期望。

吳家榮指出，全車淨重比一直嘅「底盤+車身」降低逾 800kg，即先達到慳油同減低機械損耗嘅成本；為維持產品質素同耐用程度，選用 ZF 波箱及前後車軸，配搭性能表現及可靠性早獲肯定嘅「玉柴」其近年新設計的 YCK 系列引擎。總體車價比選用日本牌子底盤裝配車身稍低，相信能獲得業界垂青。

佢另外表示，為維持產品質素及訂單生產流程嘅順暢，除會委派專人團隊適時前赴威馳騰於漳州嘅廠房視察跟進之外，更於漳州購置物業，方便團隊成員逗留期間嘅生活所需。

發佈會展出三部新車均已「名車有主」，包括「CT Bus」全長11.6m 採用3+2 佈局60座位版本，採用「玉柴」 YCK9-350 引擎；「駿景巴士」全長12m 採用3+2佈局67座位版本，引擎則為「玉柴」YCK11-410。

至於「觀塘跑狗」塗裝「嘉聯順達」的左軚規格，引擎同為「玉柴」YCK11-410引擎之外，車身更是 3.7m 版本。

外型款式雖然仍是本台曾經測試介紹嘅 CK2021，但車廂設備都加入一啲新元素。其中引起最多討論嘅當然係「高鐵式窗簾」

三部展車側邊尚有一部威馳騰生產擬運往英國嘅12m 電動巴士。

「CT Bus」除咗展覽嘅一部之外，更即場與「中港」簽約訂購10部新車。另據「中港」方面透露，連同新田廠房及漳州工廠，兩地尚有相當數量嘅訂單生產進行中，預計今年內陸續交付客戶。

兩部右軚新車，我哋早前已經做咗個短程試駕。至於會否作詳細介紹，請繼續 Bookmark 網站同訂閱 Facebook page 及 YouTube 頻道。或者可先重溫返之前一集測試介紹中港車身 Scania 旅遊巴士嘅節目。