轉眼之間隨著時間流逝，時間已經嚟到六月底，距離伴隨港人四份一世紀嘅新世界第一巴士服務有限公司（新巴）嘅專營權提早結束不足十日，兩巴專謍權將於「香港回歸日」合併為新嘅城巴（市區及新界專營權），新巴已於較早時間每逢週末都開設送別路線人力車觀光巴士H1B號，行走新巴的發源地，讓大家回顧新巴的光輝歲月。
在踏入新巴步入服務大眾嘅尾聲，由6月16日起直至7月2日*服務更擴展至每日服務大家。由中環 (天星碼頭) 開出時間為晚上8時（星期六、日及公眾假期加開上午10時, 11時及正午12時三班）；尖沙咀(漢口道) 開出時間為晚上9時半（星期六、日及公眾假期加開上午11時半, 12時半及下午1時半三班）
*7月1日及2 日班次改為城巴營運
**此文發佈時最後一班由新巴營運嘅日團已經開出，新巴負責之夜團將服務至6月30日止
H1B號 觀光路線係由新巴「人力車觀光巴士」部門主理，為配合主題特意為其中一輛人力車觀光巴士（車隊編號：5550）復刻成新巴成立初期，接收中巴巴士時嘅中巴「藍戰士」色彩，令依個經典中巴非空調巴士色彩再次展示係大家嘅眼前。
至於路線亦經過悉心設計，行程均會途經與新巴密切但應該不會令遊客感到悶場嘅地點。例如由中環開出的班次將會途經新巴的「自家大本營」創富道車廠，城巴的柴灣車廠，當然唔少得昔日新巴「開張」時向中巴租用但現正拆卸的常安街車廠。
柴灣創富道嘅新巴車廠有咩咁威水？除咗佔地13,000 平方米，樓高7層只係耗時約兩年完成興建；車廠嘅設計容量高達每日可為1,000 部巴士進行維修保養等後勤支援工序。更唔少得車廠入口設有8套「快速入油鎗」，每枝「鎗」只需要大約 6分鐘就可以將一部巴士油缸容量約400升「打爆缸」，足夠全日行駛嘅需要。
新巴嘅行政辦公室亦响車廠大樓內。响2003年新巴母公司收購城巴後，兩間公司合併同精簡部分後勤人手，但喺專營權條款嘅限制下，仍然需要分開「新巴」及「城巴」兩間公司嘅名義嚟運作。而响嚟緊嘅7月1日專營權正式合併後就可以「一家人齊齊整整」服務全城！
車廠之後就會去到新巴在港島東區佔地最大嘅總站 ─ 筲箕灣巴士總站。呢個喺 1980年代因興建地鐵港島綫及東區走廊第二期工程而响「天橋底」興建嘅大型巴士總站，將原本分散响附近街道嘅「擺街總站」路線集中一齊，成為區內的交通樞紐。新巴响開辦初期，曾經喺呢道舉辦過唔同活動，例如「新里程新巴」、專為15號線特別設計嘅超短矮身版本「丹尼士三叉戟」嘅新車記招；LV30嘅「勝利二型光榮告別旅程」，同埋DM28嘅「再見我的熱狗」歡送之旅。
巴士跟住就會經東區走廊及紅磡海底隧道過海，唔好以為純粹「順路」，當年新巴開辦8P號線，以興發街作「駁腳點」使能最短時間往返柴灣及銅鑼灣，將城巴嘅 8X「一鋪打殘」，亦可算是新巴嘅「威水史」之一。紅隧更是 (曾經的) 三間專利巴士公司「兵家必爭之地」，新巴同樣積極「參戰」，例如同是往返東區，新巴的106/112/116 總與城巴的102 拼過你死我活。
過海之後就到香港旅遊業重點區份的尖東海旁、星光大道，進入尖沙咀碼頭巴士總站「繞場一週」後至尖沙咀(漢口道) 半島酒店旁為班次嘅終點。
至於由尖沙咀開出的班次，經紅隧及香港仔隧道至歷史悠久的黃竹坑車廠，然後沿香港仔海傍至即將清拆嘅「平民海景豪宅」華富邨。
然後沿住同樣係新巴嘅「主戰場」之一嘅薄扶林道，經山道天橋直落上環至中環碼頭總站。
H1B單程原本收費 HK$39.80，依家加到 HK$41.80，純粹遊車河其實已經差唔多，再加埋路線經過之處都充滿新巴嘅歷史記載，與及從訪港遊客角度而言亦極具特色。姑且當賣廣告，H1B 路線唔係只適合巴士迷，係一家大細都啱嘅路線，大家不妨趁最後機會感受一吓。
1 Trackback / Pingback