新巴最後倒數 終極尾班車會係…

服務咗香港人接近25年嘅新世界第一巴士服務有限公司（新巴），佢嘅專營權嚟緊會喺2023年7月1號同城巴有限公司（城巴）嘅專營權合併。

城巴喺2023年6月26號發出新聞稿，表示新巴牌頭嘅最後一班常規路線巴士，會係970X號路線，如無意外按照時間表將會喺2023年7月1號凌晨大約一點半由長沙灣（甘泉街）巴士總站開出，前往香港仔。

因應預計送別新巴嘅市民人數眾多，新巴當晚會安排最多「4架」巴士接載最後一班970X號路線嘅候車乘客。長沙灣（甘泉街）巴士總站地方狹窄，為咗應付驟然增加嘅人流，新巴當晚會加派人手喺現場維持秩序。

城巴（專營權一）以及新巴嘅專營權喺2023年7月1號凌晨時分正式合併成為新嘅城巴（市區及新界巴士網絡專營權），喺新專營權之下開出嘅第一班巴士，會係屬於通宵路線嘅N8P號路線，將會喺凌晨4點由小西灣（藍灣半島）巴士總站開出，以循環線方式去到灣仔（港灣道）折返。

城巴表示當晚會調動更多嘅資源以及加派更多嘅人手，務求令到交接順利。往後服務香港人25年嘅新巴將會畫上句號，由服務香港接近45年嘅城巴全面接管，繼續接送乘客。