新巴身披城巴「新」車身塗裝 率先服務市民 「係咪即係你贏咗？」

話說之前講到，除咗更新企業品牌形象，城巴仲決定會為旗下車隊所有巴士更新車身塗裝。城巴自1979年喺香港提供公共巴士服務，巴士車身嘅塗裝一直以黃色為主調，為咗樹立全新嘅企業形象，公司設計咗5款新嘅巴士車身塗裝設計，概念分別源自保留城巴經典嘅黃色、以及早前推廣零排放轉型計劃「#MissionZero」嘅特別「拉花」設計。

為咗畀公眾更加清楚了解到呢5款新巴士車身塗裝設計，城巴安排咗5架巴士各自披上1款新巴士車身塗裝設計，安排喺中環海濱活動空間舉行「中環夏誌2023」活動當中嘅「One Citybus」展覽中向公眾展示。

城巴新巴即將合併 5款新城巴車身色彩 「中環夏誌」中展出 全港市民可以上網投票篩選

2023年6月20號，城巴發出新聞稿表示之前嘅公眾投票，5款新巴士車身塗裝設計，以編號4、5得票最高，分別有23.9%以及35.7%嘅投票市民支持，可以晉身內部員工投票階段。

新城巴車身色彩最後2強出爐 「都話咗係內定㗎啦」？！

員工內部投票之後，城巴將會安排喺專營權合併生效嗰日——即係2023年7月1號——正式公佈獲選嘅新巴士車身塗裝設計，亦會以高效率嘅方式為旗下大約700架巴士換上呢個新嘅車身塗裝。

不過，正當2023年6月23號中午「中環夏誌2023」活動當中嘅「One Citybus」展覽更換展品，將嗰5架新巴士車身塗裝樣板換走，用威馳騰WSD6121BR1EV電動雙層巴士代替，去到傍晚時分，身披樣板新塗裝之一、被城巴號稱得票率最高嘅「5號仔」（新巴12米版本Dennis Trident E500 Turbo，車隊編號：5838，車輛登記：WA9370）就被安排咗去行走新巴旗下嘅8P號路線。

佢能夠率先成為公眾投票之後第一架正式接載乘客嘅城巴新車身塗裝巴士，係咪暗示佢本身就已經係「注定會贏」呢？

怕咩吖？
香港完善咗選舉制度㗎嘛！