昔日中巴「豪華巴士」再展風華 元旦日朝港島北岸「巡迴試車」

得到各贊助人支持同技工一番努力下，以下2架由香港本地古典巴士保育組織 – Island Vintage Bus（IVB）保育嘅前中華汽車（中巴）旗下巴士，喺較早前剛啱完成咗大規模修復工作：

• MCW Metrobus 豪華巴士（MC6）
• Dennis Dart 單層機場巴士（CX2）

而喺 2022 年元旦日，IVB 安排兩架巴士喺港島區進行實際行車測試。今次選擇喺朝早交通流量較少嘅時間，正正因為考慮到一旦測試期間巴士發生故障，都可以減低交通造成嘅影響。

而今次嘅行車測試係喺中環到跑馬地一帶進行，喺2架巴士車上以及試車路線沿線，IVB 都安排咗工作人員沿途監察試車情況，並喺有需要時作出即時支援。

幸好2架巴士機械狀況喺修復後都保持良好，除咗一啲檢查完發覺無大問題嘅小毛病之外，2架巴士成功而且安全咁完成咗歷時約3個鐘頭嘅試車行程，工作人員無需要特意出手「救車」。

IVB 嘅目標係希望古典巴士能夠以健康嘅狀態保育落去，為香港交通歷史紀錄略盡綿力。佢哋每年投入唔少嘅人力同物力去保養旗下各成員嘅古董巴士。而家已經完成咗其中 4 架古典巴士嘅復修工作，並且喺過往多次唔同嘅老爺車展或者試車日中重現喺市民大眾眼前。

此外，IVB 亦都透過贊助人計劃，令公眾可以參與支援古典巴士嘅保育工作。贊助人會被獲邀參加專屬活動，近距離欣賞古典巴士，更加有機會參與復修古典巴士嘅工作。有關「保育經典巴士贊助計劃」詳情，可到 Island Vintage Bus 嘅 Facebook 專頁了解。

（感謝香港歷史研究組織「原圖有理」協調拍攝工作）