「觀光城巴」開篷巴士突破50萬人次

城巴喺2025年6月28號公布旗下開篷巴士業務，改名做「觀光城巴」後喺當日正式突破50萬人次。

為慶祝呢個重要時刻，城巴當日揀咗喺中環碼頭觀光城巴總站舉行「歡樂啟程 落日飛車只在觀光城巴」儀式（按：「落日飛車」喺香港實際係屬於由Big Bus Tours持有嘅註冊商標），中環碼頭嘅總站週圍都掛起咗唔少「慶祝突破50萬人次歡樂啟程」嘅宣傳橫額，期間城巴派出職員向旅客派發紀念品以及同旅客拍照留念。

根據城巴資料顯示，接載第50萬名顧客嘅「觀光城巴」係車隊編號59903喺2025年6月28號1530時由中環碼頭開出嘅H1號路線班次，巴士車頭駕駛位前面插有特別紀念牌，當時有大批旅客排隊見證呢個重要時刻。

成功上到呢一班接載所謂第50萬名乘客嘅特別班次嘅話，城巴都有派職員舉牌提醒乘客佢哋會「上鏡」參與紀念大合照，而每名乘客都會得到由「觀光城巴」所準備嘅1袋特別紀念品，巴士上面嘅報站系統亦都有相關嘅紀念畫面。

H1號路線被定為「懷舊之旅」，途經文武廟、大館、灣仔海濱長廊、星光大道等多個旅遊熱點。

呢班接載第50萬名乘客嘅「觀光城巴」喺大約1635時到達尖沙咀天星碼頭，其後返到去位於半島酒店側邊嘅九龍總站，現場有唔少嘅遊客恭候多時。

被揀中揸「觀光城巴」接載第50萬名乘客班次嘅車長睇嚟就相當興奮，當巴士去到尖沙咀半島酒店總站嘅時候，佢仲喺「攪牌」做H2號路線之後攞埋原本擺喺車頭駕駛位前面嘅紀念牌落車同尖沙咀半島酒店車站嘅站務員一齊合照。

有鑑於喺中環天星碼頭總站等候嘅乘客眾多，「觀光城巴」為免現場久候嘅乘客向隅，特別安排咗車隊編號59905喺1600時由中環天星碼頭開去尖沙咀方向嘅班次都訂為「慶祝突破50萬人次」嘅特別班次，大約1句鐘後去到尖沙咀天星碼頭，隨後到達半島酒店側邊嘅總站。

有唔少有幸搭中額外特別班次嘅遊客、以及喺尖沙咀半島酒店總站等候H2號路線嘅乘客都紛紛同呢班巴士「打卡」留念，同享「觀光城巴」嘅榮耀。

2架被揀中行駛「慶祝突破50萬人次」嘅特別班次嘅「觀光城巴」雙層開篷巴士其後繼續按照既定班次表接載乘客，一路去到夜晚嘅班次都繼續保留車頭嘅特別紀念牌畀乘客得知呢一日係「觀光城巴」嘅特別日子。

城巴喺2024年11月21號將收納自前・新世界第一巴士服務有限公司旗下嘅「人力車觀光巴士」改編，「創立」城巴自家旅遊嘜頭「觀光城巴」，由最初營運3條專營開篷巴士路線，拓展到6條路線，並且連同香港旅遊發展局、西九文化區以及昂坪360等香港本地主要旅遊夥伴建立合作關係。

為咗配合旅客人數增加，「觀光城巴」持續拓展車隊規模，截稿之時「觀光城巴」合共營運18架開篷巴士，號稱係中国全國最大規模城市觀光開篷巴士車隊。