巴士台之前報道過，日本電動車公司（EV Motors Japan，以下簡稱「EVMJ」）嘅中國製造電動巴士經常失靈，多次喺行駛期間出現失控現象，其中「大阪市高速電気軌道」（即係「大阪地下鉄」）旗下嘅「大阪市巴士」（大阪シティバス）購入原本旨在展示日本綠色交通未來嘅大阪世界博覽會自動駕駛電動穿梭巴士，已經喺日本演變成全國最令人尷尬嘅公共安全醜聞之一。
總部位於北九州嘅新創公司EVMJ為2025年大阪世界博覽會提供電動巴士，結果涉及車輛普遍存在缺陷、涉嫌偽造安全報告、大規模召回，搞到創始社長佐藤裕之辭職。隨着揭露出EVMJ提供嘅呢批電動巴士有越嚟越多問題，唔少電動巴士就陸續停駛——2026年伊始，日本有消息指出大量原本由EVMJ向大阪地鐵提供電動巴士被存放喺大阪府泉大津市某處，引發熱議，現場被戲稱為「電動巴士墳場」。
日本傳媒消息指「大阪地下鉄」旗下嘅「大阪市巴士」為2025年大阪世界博覽會購買咗150架電動巴士，另外再追加40架電動巴士作為公共路線巴士之用，而原本計劃大阪世界博覽會所使用嘅150架電動巴士會喺會期結束之後都投入日常公共路線巴士車隊。不過自從大阪世界博覽會開幕，「大阪地下鉄」開始使用呢一批由EVMJ提供嘅電動巴士，就發現好多問題而要停止使用，事到如今「大阪地下鉄」正在向EVMJ尋求退款。不過EVMJ就引用《民事再生法》申請破産保護拒絕履行「大阪地下鉄」取消合約嘅要求，所以暫時都唔清楚「大阪地下鉄」收唔收得返啲錢。
合約取消引發「爭議」
「EVMJ」喺2026年4月30號發稿聲稱「即使喺交貨過程之後，我哋仍然繼續檢查同埋提高安全性…取消合約係無法律依據。」並且質疑「大阪地下鉄」提出解除合約呢個要求係咪有效。
「大阪地下鉄」旗下嘅「大阪市巴士」由EVMJ接收咗190架「原本聲稱係國產（按：日本）」、「但實際上係中国製造」嘅電動巴士，其中150架安排咗喺大阪世界博覽會嘅會場使用，然而，早喺2025年4月、7月，呢批電動巴士就喺會場發生車輛撞牆、路緣嘅事故。
日本國土交通省其後喺2025年9月指示EVMJ檢查日本全國範圍內當時已經交付嘅317架電動巴士。2025年10月，日本國土交通省宣布對113架EVMJ賣出嘅電動巴士被發現有缺陷而要停駛維修。之後，由於擔心操作軚盤時煞車軟管可能同車身接觸，導致煞車困難，EVMJ 再召回部分已經交車嘅電動巴士。
「大阪地下鉄」2026年頭自行抽樣檢查6架由EVMJ交付嘅電動巴士，以確定呢批電動巴士係咪仲可以繼續使用…結果發現更多缺陷，包括固定車軸嘅部件斷裂，嚴重危害行車安全。 到咗2026年3月底，由於安全、保養前景唔明朗，「大阪地下鉄」宣布停用所有由EVMJ交付嘅電動巴士，並且通知EVMJ取消合同、要求EVMJ收回電動巴士兼退還購買嘅錢。
超過40億円補助金
「大阪地下鉄」以「非公開資訊」為由，一直並未透露購買呢批電動巴士嘅價格，但大阪市政府預算大阪世界博覽會使用嘅150架電動巴士總成本約為75億円。
根據《讀賣新聞》報道，上到日本國家級，下至大阪府、市級嘅政府相關部門為呢批電動巴士已經畀咗超過40億円補貼。由於呢筆補貼原本打算買咗啲電動巴士係喺大阪世界博覽會結束後用返落一般路線巴士以至其他服務，因此「大阪地下鉄」計劃連同各級政府部門以至其他相關單位討論點樣還返啲補貼。
不過咁，「大阪地下鉄」似乎未必可以由EVMJ收返購買電動巴士嗰筆錢：2026年4月14號，EVMJ向東京地方裁判所申請引用《民事再生法》作破産保護，聲稱「大阪地下鉄」嘅合約解約通知涉及債務總額大約57億円，會直接導致EVMJ無法維持現金流——EVMJ嘅呢項請求喺即日就獲得東京地方裁判所受理。
據EVMJ所講，佢哋依家會尋求支持，以幫助重建公司管理層；對於「大阪地下鉄」要求合約解約，EVMJ發言人接受採訪嗰陣回應：「我哋將會通過民事再生程序回應。」
「公眾損失」
EVMJ係1間2019年成立嘅新創公司，2026年4月14號「大阪地下鉄」 嘅代表出席大阪市議會會議嗰陣就被市議員質詢：「點解要搵1間剛啱成立嘅公司買190架電動巴士？」
據「大阪地下鉄」嘅代表聲稱，2022年決定引入電動巴士，喺選擇供應商嗰陣設定咗以下條件：
- 能夠示範實驗支援行駛時供電等
- 能夠取得自動駕駛車輛數據
- 擁有量產能力
「大阪地下鉄」嘅代表話最初佢哋考慮由國內（按：日本）製造商採購，但一時間搵唔到合適嘅製造商，而EVMJ卻又符合標準而被睇中。「大阪地下鉄」常務取締役堀元治喺嗰日嘅市議會會議上解釋：「我哋進行咗試車，以確認操作上無問題，但結果（檢查得出）效果並唔令人滿意。」
當時呢批唔知可以拎去邊度用嘅電動巴士就放咗喺「大阪地下鉄」車場入面，而「大阪地下鉄」其實係喺2018年隨着大阪市政地鐵公司化而成立，除咗向大阪市政府支付股息，其實大阪市政府係持有100%股權嘅股東，所以喺大阪市議會會議上有1位市議員就直接指出：「電動巴士嘅問題對公眾嚟講係一種損失。」
1名大阪市政府官員喺接受《讀賣新聞》採訪嗰陣就講到：「市政府唔干預『大阪地下鉄』嘅管理，亦都唔參與選擇承包商。」
「核實經營者背景」？
神戸国際大学経済学部教授中村智彥表示：「提供巨額補貼嘅國家、縣、市各級都應該成立第3方委員會，審查運營商嘅選擇過程。作為大阪地鐵100%股東嘅市政府，唔能夠一句『唔知情』就逃避，需要追究（大阪地下鉄）管理團隊嘅責任。』
Be the first to comment