【英國巴士】巴士撞牆警察查 人去樓空得大麻

當地時間2020年1月25號晚23點幾，英格蘭李斯特郡拉夫堡發生一宗涉及一架單層巴士同兩架房車嘅車禍…但當地警方未及調查車禍就已經有另一樣大發現！

話說當時一架當地Kinchbus嘅Optare Solo單層巴士，去到Derby Road、Alan Moss Road、Belton Road交界同一架藍色福特房車、一架黑色獲素房車相撞，巴士之後剷埋路邊一間屋，撞爛咗外牆。

救援人員到場確認車禍中巴士上有一名傷者被困，救出送院證實只係輕傷，無生命危險。

由於被撞嗰間屋有一隻窗同窗底嘅磚牆損毀，當地警方恐防屋入面有人受傷待救，所以拍門查問。

不過，警員多次拍門都聽唔到屋入面嘅人回應，擔心可能係傷者失去知覺，警員決定破門入屋了解情況。

警員入到屋內，確認無人喺入面…無人受傷當然可以鬆一口氣…但係警員意外發現嗰間屋入面種咗幾棵大麻，立即通知鑑證人員到場蒐證，暫時未有人被捕。

至於車禍本身，當地交通警察就調查緊，亦已經呼籲目擊者提供證供或者行車紀錄儀影片…有現場附近嘅居民就歸咎路口嗰組交通燈設定得唔好。