城巴車長準備去新屋嶺？

今早上環干諾道中港澳碼頭巴士總站對出發生交通意外，一部沿干諾道中東行嘅城巴 37X 線雙層巴士，同一部全車白色車身的旅遊巴士發生碰撞。

從網上及 各 Whatsapp 群組流傳嘅相片睇到，相撞的白色旅遊巴士車牌為 VC2790，驟眼睇係一部普通旅遊巴。
不過從另一個角度拍攝得到嘅相片所見，部白色旅遊巴士車窗為「黑玻璃」；

但根據運輸署目前以行政通告訂定實施的巴士車窗透光度規定，巴士司機位後的車窗的透光度不得低於44%，即係唔係一部「正常」嘅旅遊巴。對應返上星期响灣仔軍器廠街轉彎時「頂頭頂尾」嘅旅遊巴士其實係如今該稱為 港共軍政府武裝衛隊 嘅車輛，咁即係今朝呢部都應該都係「黑警」嘅巴士。車窗玻璃「穿晒崩」而一望就知道「車主」係乜水，又要搵霞姨問「道具組點做嘢㗎」。

意外成因、責任誰屬，我哋無去作進一步查證理解。但點講都好，平常揸車大家都應該注意安全，呢期就更加要小心謹慎，隨時揩到部「民牌車」就分分鐘好彩就48小時「邊度都唔駛去」，唔好彩就隨時…… 你知啦，上星期先有巴士車長遭質疑係「暴徒」假扮。雖則運輸業行內俗語有云「坐上司機位，半隻腳入咗監倉」，但家陣做司機嘅危險程度真係食幾噸驚風散都唔掂。

另外順便講，軍政府似乎咁就少咗架巴士用，嚟緊又要租多一部旅遊巴俾武裝衛隊出動大圍捕。邊間旅遊巴士公司會租車，其實大家都心裡有數。有人認為旅遊巴公司應該拒租，否則即係有如「36x」「美X集團」之類商號係與民為敵，遲早俾人搞到要填 T.D. 184 表格。但如果簽咗長期合約的話，又真係好難「推柯打」焗住硬食。公道講句，正如「邊個諗到一頂綠帽可能觸發WW III」，一年半載之前無人會諗得到香港政府會變成軍政府，姑且觀望吓會否身在曹營心在漢囉。