香港男歌手、演員、舞蹈員盧瀚霆（Anson LO Hon-ting，外號「教主」），喺2018年5月參加由ViuTV主辦嘅《Good Night Show 全民造星》，成為5位「Eye catching idol」之一，晉身香港男子組合MIRROR嘅成員。
盧瀚霆嘅支持者（外號「神徒」）近年都有包起一啲公共交通工具嚟賀「教主」生日，嚟到2023年都唔例外：
巴士台之前都有報道過，盧瀚霆國際後援會為「教主」2023年生日再次包起公共巴士，仲藉此發起慈善活動——推出【Anson Lo & Sontos Keep Giving • Keep Loving 人力車觀光巴士免費乘車日及慈善紀念車票】。
而去到2023年7月7號「教主」嘅28歲生日正日，盧瀚霆國際後援會係一如之前嗰年咁搵咗香港天星小輪舉辦【Keep Giving • Keep Loving】尖沙咀往返中環免費乘船日。
除咗免費搭船之外，尖沙咀天星碼頭、中環7號碼頭、天星小輪「北星號」船艙等都有「教主打卡位」：
尖沙咀天星碼頭
天星小輪北星號上層船艙
中環7號碼頭
有鑑於較早前喺2023年7月1號，有啲「愛国企業」搞嘅「免費乘船日」導致嚴重混亂以及「依食附侮」毆打香港本地人嘅「惡性事件」，天星小輪公司都特別喺當日向城市保安公司聘請額外嘅保安員駐守碼頭。
不過大家都明白㗎喇，唔牽涉到「依食附侮」嘅活動，又點會有大混亂事件？結果成日嘅「『教主』生日免費搭船日」都係一片祥和嘅氣氛之下完成。
可以順帶一提，巴士台喺黃昏時候去到尖沙咀天星碼頭採訪嗰陣，遇上一班僧侶，正當佢哋喺閘口疑惑「點解可以唔畀錢搭船」，旁邊另一名女乘客就用咗非常精妙嘅句子回答：
You can see a lot of women here,
（嗱，呢啲就真係說好香港故事喇！）
because today is “their” boyfriend’s birthday,
so they offer all people free ferry.
嗰日盧瀚霆國際後援會除咗提供免費搭天星小輪之外，亦都提供指定免費人力車觀光巴士班次，乘客只要搭中車身有「教主」特別車身廣告嘅嗰2架人力車觀光巴士班次，就可以唔使畀錢！所以無論係喺天星小輪定係喺人力車觀光巴士嘅車站，都有唔少「神徒」打卡！
而為咗突顯可以免費乘搭嘅特別班次，人力車觀光巴士安排咗特別嘅通告貼喺巴士車頭玻璃，巴士嘅電子路線顯示牌亦都會顯示特別內容：
KEEP GIVING
KEEP LOVING
免費乘搭
但係好可惜係嗰一日發生咗一啲意外事件，搞到臨尾嘅時候有啲掃興：
首先就係喺尖沙咀半島酒店嘅人力車觀光巴士總站，有一啲違例泊車停喺漢口道嘅行車線，導致到巴士唔能夠喺梳士巴利道成功轉入漢口道，需要現場嘅站務人員指示違例停泊的車輛向前移動，騰出空位俾巴士駛入。
另一方面，其中一架披上「教主」特別車身廣告嘅人力車觀光巴士就喺黃昏時候「壞車」，需要城巴安排西九龍巴士廠調派工程人員到場維修，雖然唔係用咗好耐就成功令到壞咗嘅巴士重新著車，但都已經影響咗原有安排嘅班次。
禍不單行嘅係同一架巴士喺2023年7月10號牽涉入1宗輕微交通意外，導致一度被警方扣留喺鰂魚涌汽車扣留中心。
其他活動
為慶祝「教主」生日的大日子，盧瀚霆國際後援會2023年7月7號當日下晝1300仲舉行免費派發雪糕活動，特別挑選象徵「教主」以及「神徒」嘅粉紅色（士多啤梨味）做雪糕主題顏色，中環6號碼頭對開位置嘅雪糕車同埋附送嘅雪糕紙托都印上【Keep Giving • Keep Loving】主題，為眾人留低幸福甜蜜回憶。
盧瀚霆國際後援會2023年7月7號亦首次舉辦「免費乘搭摩天輪及旋轉木馬」活動，中環摩天輪場內設有【Keep Giving • Keep Loving】「教主」生日主題佈置，整個場地充滿歡樂氣氛，猶如置身大型嘉年華，活動由1100時開始，所有入場人士都可以免費乘搭摩天輪以及旋轉木馬，紀念門票亦特別印上【Keep Giving • Keep Loving】生日主題。
2023年7月7號當日盧瀚霆國際後援會免費派發嘅除咗雪糕之外，仲有「心型應援扇」，分別喺1100時以及1900時喺中環7號碼頭對開位置免費派發。
扇上面印咗【Keep Giving • Keep Loving】主題，期望「教主」笑容可以為「神徒」打氣，帶出正能量。
最後都係嗰句：
無論你支唔支持追星呢個行為
最緊要係大家玩得開開心心安安全全
Be the first to comment