香港對旅遊巴士 3+2座椅佈局嘅討論(定爭吵？) 近期似乎靜咗啲。但响地球嘅另一邊，香港人一直以為好先進嘅英國，越來越多旅遊巴裝上 3+2 佈局座椅。過去有唔少係二手車買入或自家「中古車」改裝，但近年越來越「新車落地」都竟然係 3+2。一位移民英國揸旅遊巴嘅朋友就分享咗佢見到嘅一部新車，而講緊呢部車嘅牌子會係香港呢邊曾經見到就「嘩嘩聲」嘅西班牙 Irizar！
呢部「76牌」，即係响今年6月打後新車出牌嘅 Irizar i4，為長度12.9m 嘅版本，車廂採用 3+2 座椅佈局，載客量 71座位。引擎唔係 Irizar 長期拍檔嘅 Scania，而係荷蘭 DAF 嘅 MX11，排氣量10,800cc，輸出360PS / 1950Nm。
驟眼睇數字，比起香港嘅 12m 70座位，legroom 會闊落啲？好抱歉，英國有一條簡稱 PSVAR 嘅法例，全稱 Public Service Vehicles Accessibility Regulations ，必須裝設「無障礙運輸設備」。簡單講，即係要有輪椅升降台，佔去咗最少兩排座位嘅空間。全車嘅座位佈局為左邊3座位共12排、右邊2座位共14排，再加車尾1排5座位。因此其實不比香港嘅70座位闊落好多。
唯一嘅分別係座椅闊度為400mm，比香港嘅闊多20mm。無錯，一吋都未夠。
相信响香港嘅讀者們會想問點解英國會「回到過去」，將呢種响香港屢受批評嘅巴士車廂佈局變回普及，其中一個原因當然同人手不足有關，但據包括今次影相俾我哋在內，多位移英旅遊巴士司機嘅朋友所指，最主要係「學校柯打」要求盡量用少啲車，目的就是慳錢，唔止係車租，仲有係上車當值嘅教師人數。事關英國近十多年嘅「教師荒」非常之嚴重！教師職位空缺率達到 千份之5。好高㗎喇。
如斯乘座空間，接載學生或許問題不大，但對於成年人而言，400mm 闊度不比香港的 380mm 好得多。問過朋友們做接載成年人柯打時係咪照「迫沙甸魚」般，佢哋都話 case by case，通常都唔會坐爆71人，但亦有試過在落大雨、大雪日子的放工柯打「打爆部車」？
有問朋友「佢哋唔介意咁迫夾咩」，朋友回覆「理鬼佢哋啦，最緊要我張櫈 (司機位) 舒服就得」，不過，佢話通常嗰類廠車接送柯打嘅車程只係送去附近嘅火車站、大型巴士總站，車程唔會超過20分鐘，佢哋唔介意嘅咪照「迫夾」囉。
當 3+2 响英國「敗部復活」嘅時候，香港還是要爭吵「虐待乘客」可能講唔過去。但始終英國要有 3+2 嘅因素可能來自教育界方面，未必可以類比香港嘅情況。不過，仲有最少一類柯打係嚴禁 3+2，所指嘅係非緊急 Rail Replacement。即係例如老早宣佈咗東涌線停駛嗰啲，就訂明唔准使用 3+2 layout 嘅車。但「幾十萬人互相陪伴」嘅突發壞鐵就不受限制。
鳴謝移英旅遊巴佬 Callum Jai 提供相片及授權
Be the first to comment