梅艷芳紀念巴士 周日港島巡遊

較早前巴士台講過香港文化博物館原本計劃，裱上咗梅艷芳紀念廣告嘅利用前中巴利蘭珍寶SF15 / SV60古董巴士係會安排喺以下日子去到沙田嘅香港文化博物館外面擺放，畀一眾梅艷芳支持者圍觀「打卡」：

• 2023年12月30號（梅艷芳逝世20年正日）
• 2023年12月31號
• 2024年1月1號
• 2024年1月13號
• 2024年1月14號

負責呢一個廣告嘅香港本地藝術家阮繼增喺活動正式展開之前嘅一晚公佈呢架古董巴士未能喺香港文化博物館外展出，原因係點就睇你信阮繼增定係信楊潤雄喇。

[軟對抗？]文化博物館展覽宣傳巴士 遭投訴而被逼「退場」

當時有傳過阮繼增有考慮過直接將個廣告「落畫」，但係可能係市民嘅支持鼓舞咗佢，呢個廣告得以繼續——不過天下無不散嘅筵席…

呢個廣告原定都係只能夠捱埋個2024年1月，就喺原定廣告期臨近尾聲嘅時候，阮繼增就喺2024年1月23號傍晚公佈咗一個新嘅消息：呢一架裱上咗梅艷芳紀念廣告嘅古董巴士會再次巡遊港島市區。

根據阮繼增喺佢自己嘅網絡社交媒體帳戶所公佈嘅預計行程，當日呢一架古董巴士會分時段行走3條路線：

• 14:00 – 14:45
  • 鰂魚涌 至 太古城
    • 來回約 2至3次
• 15:30 – 16:15
  • 銅鑼灣 波斯富街 至 大坑道
    • 來回約 2至3次
• 17:00 – 17:45
  • 中環 擺花街 至 雪廠街
    • 來回約 4至6次

根據阮繼增喺佢嘅網絡社交媒體帳戶所公佈嘅預計行程，相信當日唔少港島北岸市區嘅居民或者會去到嗰一帶參加假日活動嘅市民以及遊客，都有機會親眼目睹呢一架古董巴士遊走喺鬧市嘅風采。

如果大家係梅艷芳嘅支持者，想親眼目睹呢一架紀念梅艷芳嘅古董巴士嘅話，當日就記得唔好錯過！因為好大機會喺呢次巡遊之後，呢一個紀念梅艷芳嘅廣告就會正式移除。

梅艷芳即使逝世至今已經20年，其實佢依然係香港一個重要嘅文化象徵，唔少香港人對佢仍然念念不忘，今次嘅梅艷芳紀念古董巴士，雖然幾經波折，但都不失係一次重現香港昔日風華嘅機遇。

（編按：本文附圖僅屬於巴士台以巴士台資料圖片展示呢一架古董巴士嘅外觀，並不構成示意巡遊當日呢一架古董巴士會出現或停泊嘅位置，敬請留意。）