因應東鐵綫「過海」 新巴城巴伙港鐵推出2蚊轉乘優惠

隨著港鐵東鐵綫「過海」段喺2022年5月15號正式通車投入服務，現時喺港島區提供專營巴士服務嘅城巴同埋新巴會聯同港鐵，為使用成人八達通卡繳付車資、乘搭鐵路喺會展站出入嘅乘客提供5條指定巴士路線2蚊轉乘優惠。

乘客不論係乘搭以下巴士路線喺會展站轉搭鐵路，或者喺會展站出閘轉搭以下巴士路線，如果都係使用同一張成人八達通卡繳付車資，就可以享有每程港幣2蚊轉乘優惠：

	路線	服務範圍
城巴	25A	灣仔、銅鑼灣、寶馬山
城巴	780	柴灣
城巴	788	柴灣、小西灣
新巴	1M	跑馬地、黃泥涌峽
新巴	722	鰂魚涌、太古城、西灣河、耀東邨

其中，1M號巴士路線係新巴因應港鐵東鐵綫「過海」段通車投入服務而全新開辦，服務來往跑馬地、黃泥涌峽一帶以及會展站嘅乘客。

其實鐵路不斷擴展，其他公共交通被當局有意限制服務同埋生存空間，單靠2蚊接駁優惠又可唔可以拉攏到一啲乘客？

當「一鐵獨大」，不論係缺乏競爭，到面對突發事故，以至故意配合政府限制市民出入，呢啲又係犧牲全香港人。