娛樂事業一直以嚟都係香港面向世界嘅其中一項重要文化象徵，過往香港曾經有唔少演藝人蜚聲國際，然而隨著時光流逝，有一啲大家曾經耳熟能詳嘅香港演藝人已經去到「彩虹橋」嘅另一邊，但對於佢哋一班忠實嘅支持者嚟講，呢一班香港嘅演藝人仍然喺佢哋心目中佔有重要嘅地位，更加係佢哋同香港心連心嘅一座橋樑。
回想去2003年，當年除咗疫症肆虐，對香港嚟講亦都係一啲知名演藝人殞落嘅年份。事隔20年之後，有藝術創作人就喺2023年創作咗一啲藝術品聯同文化藝術部門搞一啲展覽。
阮繼增係香港電影海報大師阮大勇之子，多年嚟都熱愛香港本地文化，由演藝界以至交通界都係佢熱愛嘅香港元素。過往佢曾經為李小龍、張國榮等唔同嘅香港巨星繪畫過紀念藝術品，亦曾經安排呢啲藝術品裱上巴士、電車作為車身廣告。
2023年4月，正當張國榮逝世20週年，阮繼增就曾經用過香港現時唯一仍然擁有有效車輛登記、被私人保育嘅退役專營雙層巴士——前中巴利蘭珍寶SF15 / SV60，裱上佢親自設計嘅張國榮紀念廣告，喺港九新界多處「聖地巡遊」，帶領香港市民重溫張國榮昔日嘅風采。
當時喺沙田嘅香港文化博物館亦正正舉行近一個關於張國榮嘅紀念展覽，所以阮繼增都安排咗呢一架裱上咗張國榮紀念廣告嘅古董巴士專程去到香港文化博物館外面，同一眾張國榮嘅支持者見面，當時吸引咗好多本地以至香港境外嘅張國榮支持者圍觀「打卡」。
沙田嘅香港文化博物館有見之前張國榮嘅展覽吸引到好多海內外嘅支持者參觀，絕對係一個適合「說好香港故事」、「弘揚香港文化」嘅契機。當時間嚟到2023年年底，正值係香港另一位演藝界巨星梅艷芳逝世20週年，香港文化博物館就舉行一個關於梅艷芳嘅紀念展覽，今次更加主動聯同阮繼增合作，再次利用前中巴利蘭珍寶SF15 / SV60，裱上梅艷芳紀念廣告…
根據香港文化博物館原有嘅計劃，呢一架裱上咗梅艷芳紀念廣告嘅古董巴士係會安排喺以下日子去到沙田嘅香港文化博物館外面擺放，畀一眾梅艷芳支持者圍觀「打卡」：
- 2023年12月30號（梅艷芳逝世20年正日）
- 2023年12月31號
- 2024年1月1號
- 2024年1月13號
- 2024年1月14號
不過正當一眾梅艷芳滿懷希望可以一睹呢一架裱上咗梅艷芳紀念廣告嘅古董巴士，噩耗驟然而來：
根據阮繼增所講，香港文化博物館公佈咗會安排「一輛特別設計的梅艷芳古董巴士亦會於二○二三年十二月三十日及三十一日，以及二○二四年一月一日、十三日及十四日停泊於博物館停車場供參觀者拍照留念」（節錄自相關新聞公報）之後，香港文化博物館喺2023年12月29號收到有市民投訴呢一個安排，香港文化博物館被逼要取消安排裱上咗梅艷芳紀念廣告嘅古董巴士畀參觀者「打卡」，而佢亦感到意興闌珊，有打算直接將呢個廣告「落畫」。
至於呢一次點解會接到投訴，不論喺梅艷芳嘅支持者定係交通迷之間都眾說紛紜，有人講到會唔會係較早前平安夜有巴士迷「訓斥」巴士總站站長嘅反響，又或者係梅艷芳胞兄梅啟明「使橫手」…但有消息人士向本台透露，「其實件事又無咁複雜嘅」：
只不過係有啲旅遊巴士業界人士投訴呢一次咁樣安排即係霸佔咗香港文化博物館僅有嘅旅遊巴士停車位…即係阻住佢哋做生意
事情真相係咪咁簡單呢？本台暫且就唔做柯南去追查「真相」，但本台想講嘅就係梅艷芳即使逝世至今已經20年，其實佢依然係香港一個重要嘅文化象徵，唔少香港人對佢仍然念念不忘——正如早前喺2023年12月26號，呢一架裱上咗梅艷芳紀念廣告嘅古董巴士就曾經去到港島進行機械測試，途經之處都有唔少市民圍觀「打卡」。
明顯呢一次活動都算係「說好香港故事」、「弘揚香港文化」嘅契機，投訴人促使搞唔成呢一次活動，明顯都算係挑起香港境內唔同族群嘅矛盾、對「由治及興」嘅一種「軟對抗」。
2 Trackbacks / Pingbacks