隨著政府公佈新皇崗口岸啟用，城巴宣布3條全新嘅城巴皇崗專線 B13、B14、B15 號巴士路線會喺 2026 年 10 月 12 號同皇崗口岸同步投入服務。城巴會係全香港唯一一間提供由香港島、九龍、新界3大地域直達皇崗口岸嘅專營巴士營辦商，實現「全城接通，過關輕鬆」。城巴同時特別推出咗轉乘優惠，市民同埋旅客由香港島各區往返皇崗口岸，只需要畀「一口價」港幣 27.6 蚊車費。此外，城巴皇崗專線亦都會喺大欖隧道巴士轉乘站同埋新田公共運輸交匯處設巴士站，方便乘客轉乘往返皇崗口岸。
B13：港島全日直達皇崗 港島出發統一收費
B13 號巴士路線係香港島唯一直達深港陸路口岸嘅全日專營巴士路線，佢其實係原有976同埋976A號巴士路線嘅延長版本，服務時間係每日0600時到2430時，成人全程車費港幣 27.6 蚊。路線由小西灣（藍灣半島）出發，途經柴灣、筲箕灣、太古、北角、中環，取道西區海底隧道、大欖隧道直達皇崗口岸。
作為香港島居民過關嘅全新首選，由中環上車搭 B13 號巴士路線，預計只需要大約1個鐘就可以直達口岸；若果喺西隧上車搭 B13 號巴士路線，最快 45 分鐘就到達口岸。
城巴為咗鼓勵市民體驗新口岸，推出咗「加碼」轉乘優惠，乘客由香港島任何一處出發，都可以選搭城巴市區路線接駁 B13 號巴士路線，全程實際總車費低至港幣 27.6 蚊——舉個例子，乘客由銅鑼灣、寶馬山或者南區出發，選搭現有城巴路線前往北角、中環或者西隧轉搭 B13 號巴士路線，兩程車費合共只係需要港幣 27.6 蚊，相等於首程市區路線獲全額豁免。
不過，如果大家係乘搭途經大欖隧道轉車站，來往天水圍以及香港島嘅967、969系列巴士路線，然後轉搭B13號巴士路線往返皇崗口岸嘅話，就必須要喺指定嘅轉車站轉車，先至可以享用相關嘅轉乘優惠。
雖然城巴B13號巴士路線同埋967、969系列嘅路線，同樣都會途經西區海底隧道轉車站、大欖隧道轉車站。不過根據城巴公佈嘅資料，大欖隧道轉車站轉搭B13號巴士路線嘅優惠價，只適用於喺西區海底隧道轉車站上車嘅乘客。如果港島區已經上車乘搭967、969系列巴士路線嘅乘客，如果需要轉搭B13號巴士路線，又想享用轉乘優惠嘅話，就必須喺西區海底隧道轉車站轉車。若然有乘客由港島區上車，然後喺大欖隧道轉車站轉搭B13號巴士路線嘅話，係唔能夠享用轉乘優惠嘅。
B14：九龍市中心直達皇崗
B14 號巴士路線提供由啟德以及宋皇臺站往返皇崗口岸嘅特快直達服務，巴士站亦鄰近新蒲崗以及九龍城住宅區。
城巴表示呢條路線停站少、車程快，全程取道中九龍繞道、大欖隧道、新田公路等快速公路，由九龍市中心出發最快只需要 40 分鐘就可以直達皇崗口岸。營運初期服務時間定喺每日上、下晝繁忙時間嘅0800~1100時以及1800~2100時，成人全程車費港幣 20.8 蚊。
B14 號巴士路線除咗連繫九龍核心地段以及皇崗口岸，仲專為往來啟德體育園嘅旅客提供便捷嘅一程直達服務。為咗提升區域連繫，將軍澳、中九龍、啟德跑道區嘅居民轉搭 B14 號巴士路線都可以享有城巴市區路線免費轉乘優惠，涵蓋將軍澳 793 號巴士路線、慈雲山及黃大仙嘅 E23 系列巴士路線，以及多條現時由城巴提供嘅啟德跑道區專營巴士路線。
B15：屯門及北部都會區直達皇崗
為咗照顧新界居民嘅過關需求，B15 號巴士路線每逢周六、周日、公眾假期提供全日服務，服務時間係 0600 時到 2430 時，成人全程車費港幣 15.5 蚊。路線覆蓋屯門市中心、安定／友愛、屯門站、洪水橋等地區，一程直達皇崗口岸，為新界以及北部都會區居民提供兼具彈性同埋效率嘅過境專營巴士服務。
四大口岸網絡全覆蓋 全面準備迎皇崗
城巴表示已經準備就緒迎接皇崗口岸啟用，初期城巴營運團隊會密切留意客量需求，並且已經預留充足嘅後備巴士以及車長人手，按照實際情況喺適當時候加密班次以迅速疏導人潮，確保口岸交通順暢。同時，城巴推出皇崗口岸交通專屬網站，乘客可以瀏覽了解路線資料及轉乘安排。
對於B14、B15號路線只喺特定時段提供服務，城巴營運總監馬詹唯表明，日後會因應整體乘客量，主動向政府就延長服務時間進行溝通。
城巴策劃及車務編制主管黃漢中表示，當口岸出現人流高峰期，城巴將會因應同當局建立嘅機制，安排部份由口岸開出嘅巴士，行走短途特別班次，以疏導人潮。
城巴發言人表示，呢3條路線會安排「全新」嘅雙層巴士行走，車廂設有行李架以及2個「輪椅位」，以配合過關人潮高峰。
城巴表示旗下口岸路線網絡全面覆蓋香港四大主要陸路口岸——皇崗口岸、深圳灣口岸、香園圍口岸、港珠澳大橋香港口岸。配合「城巴全港遊」24小時、48小時、72小時觀光套票，旅客可以憑一張套票暢遊全香港，無限次乘搭城巴路線，輕鬆自選切合行程需要嘅口岸往返香港，並且前往各個熱門旅遊景點，享受最具彈性嘅交通以及觀光方案。
皇崗口岸新路線開線初期 以電子支付提供優惠
城巴同時宣布聯同 AlipayHK 以及支付寶推出城巴皇崗專線 2 蚊折扣，呢次合作旨在吸引市民同埋旅客選搭城巴體驗新口岸嘅便利，並且為乘客提供便捷實惠嘅交通方案。
城巴為皇崗口岸開辦 3 條全新專營巴士路線，服務網絡覆蓋香港島、九龍、新界，連接港島東、中環、上環、啟德、新蒲崗、屯門、洪水橋等多個住宅區、商貿區或旅遊熱點。
自路線喺 2026 年 10 月 12 號投入服務起，乘客喺 3 條城巴皇崗專線嘅沿線巴士站，登車前只需要掃描張貼喺巴士站柱嘅指定二維碼，就可以輕鬆領取港幣/人民幣 2 蚊折扣優惠券。成功掃碼領券後，優惠將會自動適用喺下一個城巴車程。乘客使用 AlipayHK「易乘碼」或者支付寶「乘車碼」繳付車費嗰陣，系統會自動扣減相應金額，毋須額外操作，過程方便快捷。由皇崗口岸入境香港，乘客可以喺港方口岸區嘅城巴上客點掃描指定二維碼，領取優惠券享用折扣。
為咗畀更多乘客受惠，優惠期內，每名合資格用戶每日最多可以領取2張優惠券。呢次優惠計劃初步為期 60 日，每日名額有限，先到先得。乘客可參閱條款及細則了解優惠詳情。
城巴表示一直致力拓展以及完善口岸巴士網絡，以滿足日益增長嘅跨境通勤以及旅遊需求。城巴期望透過呢次合作，進一步便利市民穿梭港深，為乘客提供優質以及便捷嘅出行體驗，促進大灣區交流。
市民：期待已久能夠有專營巴士直達口岸
2026年10月9號下晝城巴喺九龍啟德世運道簡約公屋南面入口對開嘅巴士站舉行記者招待會期間，有附近居民聞訊到場了解新巴士路線嘅資料，據佢哋所講，因為生活所需經常需要北上工作，以往啟德新發展區缺乏輕易抵達口岸嘅專營巴士服務，呢次城巴開始新路線「真係方便咗好多」，而呢啲直達口岸嘅專營巴士路線「係大家街坊等咗好耐嘅嘢」。
Be the first to comment