城巴合併專營權後首屆《優秀車長大賽》　新塗裝巴士照亮車廠

城巴服務香港超過45年，多年嚟開辦多條公共巴士路線，陪伴香港市民穿梭往來香港唔同地區，為全香港市民提供優質以及專業嘅公共巴士服務。隨著2023年新巴原有嘅專營權合併到城巴旗下，加上城巴成功投到十四鄉嘅巴士路線專營權，城巴表示對公眾承諾更致力推廣道路安全，為旗下車長提供更多嘅培訓、進一步提高旗下車長對安全駕駛嘅態度以及良好服務嘅意識。

遴選過程

2022年城巴重點籌辦咗第一次《年度優秀車長大賽》，廣受公司內同事歡迎，2023年嘅比賽亦喺2023年10月開始接受報名，收到210位巴士車長申請參加比賽。城巴首先綜合以下各項選拔標準同埋多輪評核遴選：

• 工作表現評估
• 筆試評核
• 路試評核
• 面試評核

最終營運及工程部（港島）（OEI）以及營運及工程部（九龍及新界）（OEK）各有6位優秀嘅巴士車長因為工作表現、駕駛安全意識、道路知識、顧客服務等多方面表現脫穎而出，成功晉級總決賽。

決賽時刻

城巴《年度優秀車長大賽2023》總決賽就喺2024年1月13號假城巴西九龍車廠舉行，12位晉級總決賽嘅巴士車長同場比拼多項駕駛技術，角逐「年度優秀車長」嘅冠軍寶座。

當日朝早11點，由港九街坊婦女會孫方中小學銀樂隊及儀仗隊嘅表演引領開幕儀式，標誌著城巴《年度優秀車長大賽2023》總決賽正式開始。

城巴《年度優秀車長大賽2023》總決賽總共分咗兩個回合，巴士車長需要根據場地入面嘅佈置，揸著12米版本嘅富豪B8L型雙層巴士（車隊編號：52102、52103、52104、52105）完成指定項目嘅要求，過程之中嘅一般準則包括：

• 撞到綠色雪糕筒：每個扣5分
• 撞到紅色雪糕筒：每個扣10分
• 需要靠倒車調整行車軌跡：每次扣8分
• 完成唔到任何一個項目：扣除該項目所有分數
• 每個回合超出限定時間：按超時秒數扣除總分嘅特定比例
  • 超時1~30秒：扣總分20%
  • 超時31~60秒：扣總分40%
  • 超時61秒或以上：扣總分100%

第一回合

第一個回合喺朝早1130時到1315時期間舉行，當中分咗4個分項，每個項目總分50分，全部4個項目要喺限時4分鐘之內完成：

• 緊急停車（呢個分項有額外評分準則）
  • 車長揸巴士按照車頭到達嘅嗰一格：得到嗰一格入面嘅分數（10~50分）
  • 煞車前未達到時速20公里：扣除呢個分項嘅所有分數
  • 根據巴士上「智駕全城」系統「重煞警號」：
    • 無警號：唔扣分
    • 輕微：扣除呢個分項嘅30%分數
    • 嚴重：扣除呢個分項嘅70%分數

• 泊車（呢個分項有額外評分準則）
  • 倒車前無響咹：扣5分
  • 無將巴士完全泊入劃線入面：扣7分

• 迴旋彎

• 轉換車道

第二回合

決賽日完成咗第一個回合之後，當中得分最高嘅6位巴士車長會進入喺下晝1315時到1405時期間舉行第二個回合嘅比賽，接受難到更高嘅挑戰，當中分咗4個分項，每個項目總分50分，全部4個項目要喺限時4分鐘30秒之內完成：

• 窄位掉頭

• 連續直角轉彎

• 8字彎（但硬係覺得呢個其實應該叫做「S字彎」）

呢個分項應該都算係當日最「娛樂」到一眾觀眾嘅一個分項
因為當日呢一個分項要短距離之內「蛇行」
考起咗參賽嘅巴士車長

👆🏻掃低一個🤦🏻‍♂️

👆🏻呢個直情被後轆輾過🤦🏻‍♂️

👆🏻「傷者」被「救出」之後當場證實「不治」🤦🏻‍♂️

👆🏻反正掃低咗頭兩個唔爭在掃低埋尾兩個一於嚟個「四喜臨門」🤦🏻‍♂️

有喺現場觀戰嘅巴士車長就話：
現實入面又點會真係個人企定定喺度任你撞吖？
正常人都自己走咗啦！

（師兄你講嘢咁有道理…呢鋪真係撐你呀！）

• 停靠巴士站（呢個分項有額外評分準則）
  • 車長停好巴士之後可以按照輪椅斜板中間箭咀標記指著「模擬行人路」上面嘅分數格仔：得到嗰一格入面嘅分數（10~50分）
  • 如果停定之後巴士再次移動：扣除呢個分項嘅100%分數
  • 如果未能正確使用輪椅地台板或者未能夠將輪椅推到指定方格入面：扣除呢個分項嘅100%分數

大家覺唔覺得呢啲🐻輪椅乘客好可愛呢？

公司高層在場觀戰

大家唔好以為成個比賽過程淨係得評判同埋平日嘅前線同事以及家屬做觀眾喎！

其實匯達交通嘅高層係有到場一直觀戰，見到做得好嘅巴士車長，佢哋都係衷心讚賞、拍爛手掌。

另外仲有運輸署安全總監陳玉華女士、香港立法會（航運交通界）議員易志明先生，期間佢哋仲同公司高層交換咗對香港公共巴士服務嘅意見。

比賽以外

除咗可以睇一眾巴士車長點樣有技巧咁喺比賽入面攞分，城巴喺呢次活動入面都安排咗啲娛樂活動畀大家玩嘅…

平時覺得巴士車長坐喺個司機位扭吓軚好容易呀？畀你試下扭軚過迷宮睇下點樣吖！

「揸巴士都係不外乎『畀油』、『煞車』嘅啫！」不如試試推巴士車仔去指定分數嘅格仔，嗱，呢樣嘢容易過揸真巴士㗎！記得唔好「反車」喎！

揸車要講準確「睇位」嘅，不如試吓手眼協調，喺旋轉盤上面用磁石「魚竿」吊返起啲巴士吖！

如果對住呢啲遊戲都「一試投降」，唔緊要嘅，有另外一樣嘢一定啱大家：飲飲食食！

城巴管理層落場「挑機」港鐵巴士車長

城巴嘅管理層邀請到港鐵巴士部嘅車長去到城巴西九龍車廠一齊進行友誼賽，顯示香港公共交通業界嘅良好關係，共同鼓勵市民熱愛公共交通工具——而呢場友誼賽就會用返原本城巴《年度優秀車長大賽2023》總決賽第二回合嗰4個項目作出比拼。

正式落場比拼之前，幾位港鐵巴士部嘅車長都一齊企喺比賽場地側邊，齊齊研究比賽場地有乜嘢刁鑽難度位，諗下點樣可以克服呢一啲困難。

到1410時正式開始呢一場城巴管理層以及港鐵巴士部車長友誼賽，率先出場嘅係城巴策劃及車務編排主管黃漢中，作為代表城巴出席唔少重要場面做頭班車或最後一班車嘅巴士車長，黃漢中都被城巴唔少同事寄予厚望。

話說黃漢中喺頭幾個項目確實做得唔差嘅，不過去到最後一個項目「停靠巴士站」嗰陣就發生咗一段小插曲：當時黃漢中為咗回應喺比賽場地側邊拍手打氣嘅同事，爭啲唔記得「開輪椅斜板」就已經推巴士上面嘅🐻輪椅乘客落車。

咁咪即係爭啲變咗「飄零燕梗圖」事件？😱

好彩埋門嗰一下黃漢中醒覺到做漏咗「開輪椅斜板」呢個步驟——其實呢個小插曲都係正正引證咗「行車時切勿與巴士車長談話」避免巴士車長分心係幾咁重要！

之後就係輪到港鐵巴士部出場，出戰嘅係邊倩倩車長，呢一次港鐵巴士部自己帶埋巴士嚟到城巴西九龍車廠參加友誼賽——佢哋揀咗11.3米版本嘅富豪B9TL型雙層巴士（車隊編號：348）落場。

咦？11.3米短過12米喎！
港鐵巴士部嘅代表相比城巴管理層代表咪會容易啲過關囉？
（少年你太年輕了！）

港鐵巴士部派出嘅呢一款富豪B9TL型雙層巴士，雖然長度比起同場比賽嘅城巴富豪B8L型雙層巴士短，但係港鐵巴士部呢一款係「尾軸驅動」，而城巴嗰一款係「中軸驅動」，港鐵巴士部嘅巴士相比城巴嘅巴士就會有較大嘅「輪差」——即係需要較大嘅「迴旋半徑」——遠遠抵消咗長度嘅差別！

邊倩倩喺第一個分項「窄位掉頭」就已經發現佢哋港鐵巴士部嘅巴士「唔夠軚」，需要工作人員收走最少兩綠色一紅色雪糕筒，先至能夠完成呢一個分項。

其後邊倩倩去到「8字彎」項目嗰陣時，發覺佢哋港鐵巴士部帶嚟嘅巴士無可避免會掃走雪糕筒㖭！

比賽過後，一眾港鐵巴士部嘅代表都有討論過佢哋嘅巴士喺呢一個場地嘅表現，大家都好疑惑「可能堂軚要再扭多三圈先至過得到」——今次實戰都證明咗所謂「中擔車」同「尾擔車」之間「輪差」嘅分別都真係幾大。

至於壓軸出場嘅就係城巴董事總經理李卓豪（Richard Hall），話說佢就曾經提出過，作為一個專業嘅巴士車長，其中一樣對自己嘅重要要求就係「安全穩定接載乘客一程」，所以佢先至諗起要搞《年度優秀車長大賽》——佢應該唔會失手嘅！

結果李卓豪當然就不負眾望，成個過程入面好流暢咁樣完成咗4個分項，就連唔少巴士車長都失手嘅「8字彎」項目，佢都一氣呵成咁樣完成！

當輪到結尾最後一個項目「停靠巴士站」，李卓豪唔單止成功咁將巴士「輪椅斜板」上面嘅箭咀指到最高嘅50分區域，而且佢仲話畀大家知喺佢呢班巴士上面嘅輪椅客除咗有可愛嘅🐻之外，其實仲包括善水資本管理合伙人馬良（Nicolas de Mascarel）！可見佢對自己操縱巴士嘅能力幾有信心！

友誼賽之後，3位參與呢個友誼賽嘅城巴管理層以及港鐵巴士部代表都有上台分享喺呢個友誼賽入面有乜嘢刁鑽困難位置，原來除咗「8字彎」，「直角轉彎」都幾複雜㗎！

城巴《年度優秀車長大賽2023》邀請得政府官員、立法會議員、一眾同事以及其親友聚首一堂見證歷史，城巴期望透過《年度優秀車長大賽》進一步推廣巴士業界安全駕駛，同時塑造巴士行業專業形象，擺脫過去一般人認為巴士車長「只係坐喺巴士司機位畀油煞車就過一日」嘅錯誤刻板印象，吸引優秀人才加入。

獎落誰家

經過重重挑戰，各個獎項嘅精英順利誕生，喺當日活動尾聲嘅頒獎典禮之前，城巴有限公司首先致送紀念品畀參與友誼賽嘅港鐵巴士部代表。

然後再請到城巴2022年首屆「年度優秀車長」冠軍嘅梁小均上台，向台下一眾城巴車長以及嘉賓講解自己工作上經驗所得嘅一啲駕駛技巧要訣。憑藉喺城巴入面優秀嘅工作表現，梁小均喺2023年11月獲得晉升成為督察，佢表示肩負多咗一份責任：要喺日常工作之中盡力協助其他同事，將專業精神薪火相傳。

嚟到正式頒獎嘅環節，首先頒發嘅係一啲特別獎項，打頭陣嘅有「最具知識車長」獎，得獎者係要喺遴選過程入面筆試以及面試當中獲得最好嘅成績，呢次嘅得獎者係李健民車長，得到一個獎座以及獎金港幣1000蚊。

之後係「最專業車長」獎，得獎者係要喺遴選過程入面路試當中獲得最好嘅成績，呢次嘅得獎者係何志恆車長，得到一個獎座以及獎金港幣1000蚊。

跟著就係「最有技術車長」獎，得獎者係要喺決賽日項目當中獲得最好嘅成績，呢次嘅得獎者係劉錦基車長，得到一個獎座以及獎金港幣1000蚊。

緊接落嚟就係喺12位能夠晉級總決賽嘅優秀車長獲獎時刻，首先係頒發「優異表現」獎畀排名第7~12名嘅巴士車長，包括冼錦鴻、何志恆、麥嘉文、王楓、蔡榮華、李俊鴻，每人各自得到一個獎座以及獎金港幣1000蚊。

下一批就係頒發「卓越表現」獎畀排名第4~6名嘅巴士車長，包括朱小滇、郭明有、梁思傑，每人各自得到一個獎座以及獎金港幣2000蚊。

揭曉個人獎項三甲之前，中間就先頒發咗團體獎項，先唔好覺得參賽嘅只係得OEI、OEK兩個部門咁少，事實上起碼真係有一邊贏過對方嘅…「團體冠軍」係由OEK蟬聯，佢哋可以每人有一個獎牌，而團體就再有一塊大獎牌以及獎金港幣20000蚊。

至於講返個人獎項入面嘅三甲，呢啲大獎梗係要搵啲大人物嚟嘅頒發㗎啦！呢啲重要時刻出嚟嘅分別有善水資本管理合伙人馬良（Nicolas de Mascarel）、匯達交通服務首席執行官譚利民（Adam Leishman）、城巴董事總經理李卓豪（Richard Hall）。

個人獎項季軍得獎者係之前已經得到「最具知識車長」獎嘅李健民車長，得到一個獎座、一個獎牌以及獎金港幣5000蚊。

個人獎項亞軍得獎者係劉肇庭車長，得到一個獎座、一個獎牌以及獎金港幣8000蚊。

壓軸出場嘅個人獎項冠軍得獎者係之前已經得到「最有技術車長」獎嘅劉錦基車長，得到一個獎座、一個獎牌以及獎金港幣15000蚊。

尾聲

決賽日嘅活動喺1500時完結，大家喺搭穿梭巴士返出去富昌邨之前，梗係唔少得嚟返張大合照先㗎啦！

短評

如果有返咁上下年紀嘅巴士迷，應該都會有去過參觀香港另一間大型專營巴士公司嘅類似比賽活動，要論場地就真係各有千秋。

對於城巴嚟講，話就話啱啱先至第二次搞咁嘅比賽活動，但係不論喺觀戰、遊戲到「填肚」都叫做到無乜嘢好批評，一眾高層唔介意同參與今次活動嘅觀眾交流意見，亦顯得出呢間公司有心銳意改善自己以至整個行業嘅形象。

成果會係點就真係要留返畀時間推移之後先至知喇！

廣告

城巴表示「新入職獎金」加碼到港幣18000蚊，呢個「期間限定」安排仲延長到2024年2月底，呢段期間面試成功嘅巴士車長，意味可享高達港幣30000蚊嘅平均月薪。配合領先同業嘅「原區就業」以及「半日制車長」策略，城巴決心吸引更多居住喺新界區嘅新力軍加入團隊，瞄準市場所需提供便捷以及優質嘅就業機會。