遊客絡繹不絕嘅熱門日本旅遊城市——京都，公共巴士係不可或缺嘅公共交通工具，隨住乘客量不斷飈升，京都市正式展開討論，準備引入一項「全日本首創」嘅突破制度，就係喺市營巴士車費入面引入「雙重票價」，當局目標係喺 2027 年度內正式實施。
營運市營巴士嘅京都市交通局所提出嘅「市民優先價格」，係指京都市本地市民嘅車費由現時嘅 230 円減到 200 円，而京都市本地市民以外嘅乘客就要加到 350 ~ 400 円，如果成功落實，將會係全日本首次喺公共交通工具上實施雙重票價。
呢個構思嘅背景，係因為京都市巴士近年被訪日遊客逼到大排長龍、嚴重擠擁，對一般市民嘅日常生活造成好大影響，繼2026年初決定改變超過半世紀嘅上落車模式，雙重票價可以話係廣義上針對「過度旅遊」嘅對策。
不過，要正式實行雙重票價絕非易事，點樣識別京都市本地市民身份、點樣同民間巴士公司合作等，都有好多複雜嘅難關要跨過。
靠交通系IC卡同埋「個人番号卡」綁定實現「市民優先價格」
考慮到由京都市外通勤同埋讀書嘅人，京都市交通局會維持定期票（月票）價格不變。不過喺京都市本地市民優先價格之下，市民同非市民嘅車費差距最多可以去到足足「多1倍」。換言之，好似遊客呢類所謂嘅「散客」就會成為雙重票價嘅針對對象。
咁首先，「市民」同「非市民」究竟應該點樣分？
京都市交通局現正以「個人番号卡」同埋「交通系IC卡」綁定作為主要方向嚟研究。只要透過專用網站等，將「個人番号卡」資料同埋交通系IC卡綁埋一齊，搭車畀錢嗰陣就會自動享有京都市本地市民優惠。
其實用「個人番号卡」定優惠車費呢種做法，群馬縣前橋市已經行先一步。前橋市搞嘅「GunMaaS」（舊稱「MaeMaaS」）就係日本全國首個成功例子，目前正為前橋市內居住嘅長者同埋後生仔提供優惠。京都市亦都打算參考前橋市嘅識別系統框架。不過，前橋市嘅情況係得1種車費，由市政府去補貼差額；而好似京都市咁樣，同時設定「市民」同埋「非市民」2種收費機制，根據京都市交通局企劃總務部企劃調查課職員松尾佳樹所講：「據我哋所知係（日本）全國前所未有。」
引入係因為市營巴士擠擁…增加嘅收入部分將會用嚟請司機
根據日本國家旅遊局（JNTO）公布嘅數字，2025 年嘅訪日旅客全年達到 4 268 萬人次，刷新咗歷史新高。
京都就好似大阪等地一樣，被稱為遊客必去嘅「黃金路線」，深受訪日旅客歡迎，隨之而來嘅就係市內公共交通工具嘅搭車人數不斷飆升。
呢個現象喺京都市交通局嘅決算報告入面亦都睇得一清二楚。
京都市交通局喺 2025 年 8 月公布嘅2024 年度全年度決算顯示，扣除通勤同埋讀書客之後，市營巴士嘅「定期外收入」（即係遊客等散客貢獻嘅收入）高達 188 億日圓（已經比 2019 年疫情前微增 0.6%），創下疫情以嚟嘅最高紀錄。由此可見，隨住外地遊客增加，搭巴士去市內景點玩嘅人越來越多。
松尾佳樹透露，根據乘客身份去調整巴士車費嘅機制，亦都會為京都市交通局嘅財政帶來好處。松尾佳樹坦言：「考慮到（部分路段要加開班次等）『過度旅遊』對策，仲有人工、油費同物價上升嘅因素，如果唔引入雙重票價，2027 年度市營巴士嘅收支預計會出現赤字。原本加巴士車費已經係一大經營難題，今次我哋決定由遊客嚟承擔平衡業務收支所爭嘅差額。」
京都市交通局亦都表示，會將雙重票價帶嚟嘅額外收入用嚟加人工，全力加強招聘長期人手短缺嘅巴士司機。
「雙重票價」點解要以「市民」做分界線？前路依然障礙重重
以京都市營巴士為例，因為涉及公共交通，要推行雙重票價有唔少難題；不過，純粹喺民間企業入面實施雙重票價嘅例子其實越嚟越多。
例如大型主題樂園「JUNGLIA 沖繩」，門票價格就分為日本國內居民 6 930 円、日本國外居民 8 800 円。想要購買日本國內居民門票嘅人必須登記喺日本居住嘅住址同埋電話號碼，以防有人違規購買。
世界遺產「姬路城」亦都改咗入場費。由 2026 年 3 月開始，18歲或以上姬路市民入場費維持喺 1 000 円，但非姬路市民就要加到 2 500 円。姬路市長清元秀泰喺 2026 年 4 月 7 號嘅例行記者會上透露：「（2026 年 3 月嘅）收入大約係 2 億 7 千萬円，比上（2025）年同期嘅約 1 億 4 千萬円多咗一倍。」
講到推行雙重票價，網絡社交平台上面都有唔少聲音話：「既然依家円跌、物價又高，不如淨係向外國遊客實施算啦。」咁點解京都市營巴士嘅雙重票價分界線，偏偏要揀「只有市民」呢？
呢個係因為法律上嘅限制。
公共交通機構如果要改車費，必須向監管部門日本國土交通省申請。日本國土交通省審查嗰陣，根據《道路運送法》係禁止以「國籍」作為理由進行差別待遇嘅。正因如此，京都市交通局先至採用「係咪京都市民」而唔係「日本人定外國人」呢個分界標準。
京都市交通局嘅松尾佳樹話：「市民優先價格喺法律上有無問題，我哋依家仲同中央政府商討緊。如果要修改市營巴士車費，連市嘅條例都要改，所以想喺 2027 年度內實施嘅話，今（2026）年度內必須要搞掂個大方向先得。」
另外，喺京都市入面，除咗市營巴士之外，仲有京都巴士、京阪巴士、西日本JR巴士等多間民間巴士公司行駛。對於遊客嚟講，要分清楚邊間打邊間可能都有難度，隨時搞到場面大亂，所以業界點樣合作去處理呢個問題，亦都成為未來嘅一大挑戰。
松尾佳樹話：「如果營運市營巴士嘅交通局直接同其他公司傾，會涉嫌違反《独占禁止法》，所以已經交咗畀其他部門負責交涉。市民車費平咗之後，市民好可能會湧晒去搭市營巴士。我哋希望盡量爭取多一間得一間嘅公司贊成，等乘客唔會覺得唔方便。」
市營巴士擁有車費決定權嘅均一收費區入面，情況相對直接；但對於由民間營運商話事嘅路段，雙方會繼續磋商，務求「喺同一時期推行制度」。點樣避免出現「得市營巴士特別貴」或者「得市營巴士特別平」呢類混亂情況，相信會係京都市交通局未來要努力嘅方向。
京都市交通局將呢次呢個舉動定位為「全日本首創嘅先導計劃（Pilot Project）」。據講已經收到唔少來自其他地方政府同埋交通營運商嘅查詢，備受各方關注。日本中央政府預料亦都會密切留意實施後嘅成效。
雙重票價究竟可能唔可能實現「市民同遊客共存」呢個目標？距離 2027 年度呢個死線，仲有好多必須跨過嘅難關。
Be the first to comment