配備頂級安全配置以及先進駕駛輔助功能，為司機同埋乘客提供更安全、更舒適旅程
日野汽車株式會社（以下簡稱「日野」）喺2026年5月20號宣布旗下大型旅遊巴士「日野S’elega」升級版正式上市。
鑑於巴士業界對新技術嘅需求日益增長，呢次升級版「日野S’elega」車型融合咗最新嘅安全設備，包括新安裝嘅「全景影像監控系統」（Sight Around Monitor System，SAMS），呢個系統包括路口預警、左轉碰撞預警、車道變更預警功能，結合現有司機異常對應緊急煞車系統（Emergency Driving Stop System，EDSS），日野指根據佢哋嘅調查，截至2026年5月，升級版「日野S’elega」安全性能喺日本達到頂級水準。
升級版「日野S’elega」採用「12前速AMT波箱」進一步提升車輛寧靜以及乘坐舒適感之餘，亦增強駕駛性能。此外，車身設計亦煥然一新，透過提升空氣動力學性能，兼顧功能同埋美觀。不論係司機揸車體驗，定係乘客搭車體驗嚟講，升級版「日野S’elega」都會係更安全、輕鬆、舒適、愉悅。
升級版「日野S’elega」嘅實物會喺2026年5月22號假大阪府大阪市舞洲體育島舉辦嘅「2026巴士技術論壇」首次亮相，屆時提供參觀以至試揸。
日野表示，佢哋最大嘅優勢在於「綜合質素」，即係「產品質素」完美結合「全方位支援質素」，確保客戶買到嘅巴士會平穩運行。佢哋會持續提升產品嘅安全、舒適度，以應對客戶同埋社會面臨嘅需求挑戰，致力建立可持續發展社會。
標準配置嘅安全設備
交叉路口預警系統：監測前方、側方接近嘅移動物體，預警潛在碰撞風險
左、右、前方嘅廣角毫米波雷達可以偵測車頭盲點位嘅移動物體。如果有碰撞風險，系統會發出警報，並且A柱上嘅指示燈會閃爍紅光提醒司機。呢個系統有助於防止喺互視能見度差嘅十字路口發生正面碰撞，以及左轉或右轉嗰陣喺盲點位發生碰撞。
左轉盲點位警告：可以探測單車、行人等物體，有助預防左轉嗰陣盲點位出事
當左側毫米波雷達偵測到單車或者行人等移動物體，A柱上嘅指示燈會亮起黃光提醒司機。此外，如果左轉過程中有可能碰撞，系統會發出聲音警告，並且A柱上嘅指示燈會閃爍紅光進一步提醒司機，有助預防盲點位事故。
變換車道警告：可偵測盲點位接近嘅車輛，並且輔助司機「轉線」
左右兩側毫米波雷達能夠偵測到單靠睹後鏡難以睇到嘅移動物體，例如盲點位嘅汽車、電單車，A柱上嘅指示燈會亮起黃光提醒司機。此外，如果「轉線」過程有碰撞風險，系統會發出聲音警告，A柱上嘅指示燈亦會閃爍紅光進一步提醒司機，有助更安全咁「轉線」。
液阻式煞車系統：即使喺落斜路段、高速公路都能夠提供平穩而強勁制動力道
利用油嘅阻力達致減速，即使喺落斜路段以及高速公路都能夠提供平穩而強勁嘅制動力，從而提高安全並減輕司機疲勞。
可變光束分佈LED頭燈：自動控制遠光燈，確保夜間行車安全
精確控制LED嘅開關狀態，自動遮擋可能照射前方或對向車輛嘅光線，令到夜間行車嗰陣更多機會使用遠光燈，幫助司機喺夜間更輕易發現行人，從而減少發生事故。
交通標誌識別系統
呢個系統將巴士前方影像感測器辨識出嘅交通標誌顯示喺儀錶板上，從而減少因為忽略標誌而導致嘅危險駕駛行為。司機透過按鈕確認後，系統會將辨識出嘅標誌對應速度回饋到巡航控制以及可變限速器，防止超速行駛，保障安全駕駛。
司機異常對應緊急煞車系統（EDSS） ：偵測司機出現異常情況，並且將巴士沿着行車線停低，有助預防交通事故
當司機出現突發疾病等異常情況，司機本人或者服務員都可以撳司機位上面嘅掣，而乘客亦可以撳位於最前排乘客位上方嘅掣啟動煞車系統。呢個系統可以令巴士沿着行車線溫和咁減速以至煞停，有助預防交通事故。同時，巴士車廂內緊急蜂鳴器會響，乘客座椅上方指示燈會閃爍、車廂紅色閃燈也會閃爍提醒乘客。對於警示巴士車廂外面其他道路使用者，巴士會響咹，煞車燈、危險警告燈（死火燈）都會閃爍以提示其他人巴士有異常狀況。而系統仲有自動保障功能，即使未有人撳EDSS個掣，車載監察功能亦會偵測司機係咪有異常，並且透過警報聲以及螢幕顯示發出警告。如果司機無作出合理反應，呢個系統會自動介入啟動煞車，逐漸降低車速並且輔助巴士停低。
主要改進
新增12前速AMT波箱：實現媲美熟手司機嘅燃油效益
波箱採用12前速波段，可以自動進行精準低速「轉波」，即使未夠經驗嘅司機都能夠好似熟手司機一樣輕鬆「轉波」。此外，平順「轉波」過程可以維持較低引擎轉速，進而達到平順加速，有助於車廂寧靜同埋提升駕駛性能。
車身設計20年來首度更新
基於「魅力流線（Glamorous Flow）」設計理念，車頭採用流暢圓潤線條，營造動感十足嘅空氣動力學效果；車尾就採用動感鋒利線條，同樣能夠有效引導氣流。呢項設計喺空氣動力學性能同埋功能美感之間實現高度平衡。
車廂內裝變化
司機位同埋上車位採用統一高品質舒緩色調，提升駕駛舒適度。日野會提供「自然（Natural）」、「寧靜（Calm）」、「探險（Adventure）」3種內裝風格，滿足唔同使用場合需求。座椅採用環保材料，協助可持續發展。
東京地區建議配置
| 車輛名稱 | 日野S’elega |
| 規格 | 大型觀光巴士（高地台） |
| 型號 | RU1ASDY-FRDDAC |
| 引擎 | A09C 265KW（360PS） |
| 波箱 | 12前速AMT |
| 座位 | 62 |
| 價格 | 50,952,110円 （未連消費稅：46,320,100円） |
Be the first to comment