近年有一啲球隊奪得佳績之後都有香港支持者發起勝利巡遊，2023年6月3號下晝就有YouTube頻道「Just For Fun Team」為咗慶祝「阿仙奴」2022~2023年英超奪得佳績而租開篷巴士巡遊，其後「曼城香港球迷會」（MCFC Supporters Club HK）就喺2023年6月15號搞咗一次電車巡遊慶祝球隊歷史上首次奪得「歐聯」冠軍。
2023年6月先至成立嘅香港金牛籃球隊（香港金牛），成立後嘅第2個賽季就已經勇奪2024年中國男子籃球第二級聯賽——全國男子籃球聯賽 （NBL）——總冠軍，佢哋就喺2024年12月1號啟動「金耀洋紫荊——香港金牛冠軍巡遊」，由嗰日直到2025年1月中旬會有連串活動。
當日朝早香港金牛出席咗首項慶祝活動「冠軍電車巡遊」，一眾球隊成員一早喺9點鐘就搭球隊巴士去到屈地街電車廠，包括總教練解立彬、球員楊睿騏、許烜行、楊瑞鴻、侯天一、盧杜偉、孫晨然、李禹豪、余柏林、刁展望、畢繼光在內嘅職球員都有出席。
香港金牛喺屈地街電車廠出現嗰陣已經有支持者守候，球隊於是主動邀請呢啲支持者入去電車廠睇佢哋準備巡遊，仲可以同一班球員一齊合照㖭！
時間去到朝早9點半，當一切準備就緒，香港金牛一眾球隊成員就登上香港電車嘅#128開篷派對電車，喺0940時正式由屈地街電車廠出發！
面對一啲喺屈地街電車廠門口、山道電車站一帶守候嘅支持者，#128開篷派對電車上面嘅香港金牛球隊成員者紛紛揮手致謝。
#128開篷派對電車一路沿著電車軌向東行，大約1015時途經香港金牛嘅主場——灣仔修頓場館，有支持者到場喺路邊拍手歡呼相迎。
當#128開篷派對電車喺10點半去到銅鑼灣，不論係喺崇光百貨對開定係糖街天橋都有支持者夾道觀迎，球隊成員都揮手「回禮」。
#128開篷派對電車喺1035時駛入銅鑼灣電車總站，香港金牛一眾球隊成員得知有支持者係專誠「徒步跑嚟」到同佢哋見面，就決定唔理原本嘅「電車調個頭就走」安排，紛紛落車同支持者交流、拎埋獎盃出嚟同大家合照，甚至喺波衫上面簽名。
除咗「香港金牛」球隊之外
當然唔少得出動埋球隊專屬啦啦隊「Taurus金牛女孩」成員㗎啦！
稍作休息後，#128開篷派對電車喺1050時由銅鑼灣列車總站起步，向西行返去灣仔，香港金牛一眾球隊成員喺杜老誌道電車站落車，完成呢次「冠軍電車巡遊」，並且去到灣仔北鷹君中心嘅一間咖啡店同支持者短暫會面。
香港金牛喺下晝移師灣仔修頓場館，為「金耀洋紫荊 – 香港金牛冠軍巡遊」舉行啟動禮，介紹校園活動、地區同樂日、公益活動等冠軍巡遊活動內容。現場有超過100名球迷參與，球隊專屬啦啦隊「Taurus金牛女孩」亦有到場打氣以及表演，同球迷近距離接觸，分享成為首支贏得中国全國男子籃球聯賽冠軍球隊嘅榮耀以及喜悅。
曾經奪得香港甲一、甲二籃球聯賽冠軍嘅球員楊睿騏喺啟動禮表示：「NBL總冠軍係我球員生涯最重要嘅榮譽之一，呢項冠軍證明，香港球隊係可以挑戰更高水平嘅舞台，我好榮幸可以成為當中一份子。我會繼續努力裝備自己，爭取更多出場機會。」
教練解立彬感謝球迷支持：「每次喺修頓見到球迷賣力為我哋打氣，就知道我哋所有嘅付出都是值得嘅。我相信香港金牛喺呢兩年建立嘅一切，唔單止係為咗令球隊變得更好，亦都係畀本地籃球發展變得更好。」
香港金牛「金耀洋紫荊——香港金牛冠軍巡遊」活動會走訪香港島、九龍東、九龍西、新界東、新界西五大區，內容包括：
- 走入各大院校同學生交流籃球技術
- 帶領香港金牛球員到訪本地旅遊熱門景點、品嚐各區美食
- 走入社區向各區街坊推廣本地籃球
另外，香港金牛會分香港、九龍、新界3區舉辦「3X3籃球巡迴賽」，賽事參賽隊伍會以學校為單位，希望透過舉辦競爭比賽，給予年輕球員發揮，藉此推動本地籃球發展。
Be the first to comment