近月綜合多間日本傳媒嘅報道，日本電動車公司（EV Motors Japan，以下簡稱「EVMJ」）嘅中國製造電動巴士經常失靈，多次喺行駛期間出現失控現象，據悉仲曾經令到乘客受傷骨折。
呢間總部位於日本北九州市嘅商用電動車進口以及經銷商 EVMJ 最終喺 2026 年 2 月 20 號經官方網站宣布，對於呢一啲事故引致公司經營惡化，社長辭職並承擔責任：自 2026 年 2 月 28 號起，69歲嘅社長佐藤裕之退位，由53歲嘅副總裁角英信接任社長一職，佐藤將繼續擔任技術顧問。
此外，EVMJ仲公布一份中期報告，表示正在優先調查日本全國範圍內出現嘅電動巴士缺陷，透過全面檢查解決關鍵問題，並且向巴士公司提供安全確認以及說明，概述製定預防措施。
EVMJ 喺2019年4月成立，成立之後2年一直未曾向任何一間巴士公司交付過任何一架巴士嘅時候，就喺2021年宣布獨家負責採購以及營運大阪世界博覽會嘅150架電動巴士。
EVMJ曾經表示計劃喺2021~2022年喺日本國內生產呢一批電動巴士，並且預算投資100億日元喺北九州市若松區建設「零排放園區」，當中包括裝嵌廠、測試場地、總部大樓。
正當建設計劃不斷延遲，EVMJ其後曾經信誓旦旦咁話2023年可以開始喺日本國內生產電動巴士，仲講到係年產量1 600架——但實際上總部同埋裝嵌廠直到2025年春季先至竣工。
重點嚟喇：
截至2026年，EVMJ嘅工廠仲未裝嵌出任何一架電動巴士。
面對之前已經接咗嘅訂單，EVMJ嘅解決方案就係搵3間中國公司生産電動巴士，再原裝由中國進口到日本：
- 威馳騰
- 恆天
- 愛中和
EVMJ聲稱每架電動巴士都會經過重新檢驗先至拎去「出牌」——2年已經向巴士公司以及地方政府交付咗300幾架電動巴士。
不過，是咁的，由於首要任務係要喺申請補貼嘅截止日期前掟啲電動巴士出去，呢啲電動巴士嘅質素、安全就並未得到充分驗證：EVMJ進口到日本嘅電動巴士最終合格率只有大約2/3。
精彩嘅地方在於其實中國製造商對EVMJ提出過一啲質疑，甚至表明：
被EVMJ要求以極低預算、極短工期生產呢批巴士…
被EVMJ催促強行交貨就即係仲有好多細節尚未完成…
呢批巴士連廠方想做充分測試都做唔到…
所以請EVMJ唔好（喺做好測試前）直接交付畀客戶（巴士公司）。
EVMJ嘅員工就曾經批評公司喺零件缺乏足夠安全認證嘅情況下繼續銷售呢啲電動巴士，當時佐藤回應話：「唔想賣你就咪賣。」
當然，EVMJ直接無視呢啲質疑，繼續直接交付呢批電動巴士畀各間巴士公司。結果好快就收到好多電動巴士有缺陷、故障嘅報告，包括煞車軟管、逆變器異常，以及煞車分泵、摩打輪緣（「佛冷」）脫落——全部都可能導致嚴重事故。
2025 年 4 月 28 號 1630 時左右，1架使用先進モビリティ株式会社自動駕駛技術、EVMJ提供、威馳騰生產嘅大阪世界博覽會自動駕駛電動穿梭巴士抵達舞洲巴士站落客之後，當巴士車長準備由自動駕駛模式轉換為手動駕駛模式嗰陣，電動巴士突然自己向前衝，以時速大約7公里撞埋前面嘅水泥壆。EVMJ表示係「外部設定自動駕駛系統失誤」所致，確認同電動巴士本身無關。
2025 年 9 月 1 號，1架EVMJ提供、愛中和生產嘅 E1 型電動小巴喺大阪市區行駛嗰陣突然轉向失效，當時巴士車長多次嘗試向左「扭軚」，但電動小巴對於轉向毫無反應，最終撞上中央分隔島。EVMJ 起初聲稱「內部調查」認定事故原因唔係電動巴士有故障，而只係巴士車長揸巴士期間分心所致，引發日本公眾強烈質疑。
去到2025年9月3號，日本國土交通省終於忍無可忍出手，下令對EVMJ交付嘅所有電動巴士進行「全面檢查」——當時EVMJ已經交付大約320架電動巴士。
2025年10月17號，日本國土交通大臣喺記者會公佈檢查結果：317架電動巴士中有113架存在故障，部分巴士存在多處缺陷，涵蓋車門到煞車系統，全部都喺安全標準上唔合格。
隨着揭露出EVMJ提供嘅呢批電動巴士有越嚟越多問題，唔少電動巴士就陸續停駛——2026年伊始，日本有消息指出大量原本由EVMJ向大阪地鐵提供電動巴士被存放喺大阪府泉大津市某處，引發熱議，現場被戲稱為「電動巴士墳場」。
同一時間，日本多間傳媒幾乎每日都收到嚟自EVMJ現任以及前任員工、巴士公司相關人員、EVMJ附近居民，甚至巴士乘客嘅各種舉報資訊。其中由一位EVMJ員工提供嘅消息尤其令人震驚：
1架喺關東地區營運、威馳騰生產嘅小型電動巴士發生過1宗人身傷害事故
事故發生喺2025年夏季，當時呢架電動巴士「腳掣」失靈，導致巴士車長需要喺巴士即將撞擊前方車輛前被逼「撳緊急掣」緊急煞車，1名乘客由座位上被慣性力掟咗出去，導致嗰名乘客手臂以及腿部骨折，傷勢相當嚴重，需要入院留醫，目前仍然喺醫院接受治療。
隨着日本傳媒記者深入調查，發現日本全國各地嘅巴士公司，由EVMJ接收嘅電動巴士都出現類似嘅煞車問題。當中唔單只係威馳騰嘅小型（6.99米）電動巴士，其他中型（8.8米）、大型（10.5米）電動巴士都存在「閂咗『再生制動』就會『腳掣』失效，甚至『腳掣』踩得越深，巴士反而快咗，最終無法用『腳掣』控制」嘅情況。
有日本傳媒記者向日本10間有使用EVMJ提供電動巴士嘅巴士公司核實後，發現「腳掣」失效嘅常見原因係「閂咗『再生制動』嗰陣行車」。（按：「再生制動」係利用摩打可逆原理而設計，將摩打切換成發電機模式運轉，利用行車慣性帶動摩打轉子旋轉而使電磁效應下產生反轉力矩，從而「拖慢」電動車。）
日本傳媒記者總結咗接受訪談嘅多間日本全國各地巴士公司嘅相關訪談結果：
- 切勿關閉「再生制動」系統，並且要確保電動巴士行駛時電池電量低於 93~94%。過高電量會導致「再生制動」系統失效。 （九州地區某巴士公司）
- 部分電動巴士即使關閉「再生制動」系統，「腳掣」都係能夠正常運作。不過如果更新程式，相信全部電動巴士就唔會失控。 （關東地區某市）
- EVMJ 聲稱無法更新程式，只有中國製造商先至能夠進行更新，因此需要幾個月時間。 （多間受訪巴士公司都有相同講法）
- 所有電動巴士車型都存在同「再生制動」系統相關嘅問題。即使報告咗煞車問題，EVMJ都只是簡單咁話「我哋無法重演到相同問題，唯有等待觀察」，之後EVMJ就無採取任何行動。 （關西地區某巴士公司）
- 當聽到EVMJ話：「透過系統改造好難解決呢個問題。喺日本…咁係無可能嘅。」之後，目前唯有透過唔畀啲電動巴士充滿電嚟勉強維持運作。 （九州地區有營運EVMJ提供電動巴士嘅市町村）
- 如果唔使用「再生制動」，即使猛踩煞車「腳掣」，煞車都唔會有反應，電動巴士反而仲會加速。不過安裝咗相應嘅軟件係解決到呢個問題，現時已經修復。 （關東地區某巴士公司）
- 軟件已經修復之後就無遇到類似的問題。 （四國地區某巴士公司）
- 呢項缺陷比國土交通省要求召回嘅煞車軟管缺陷危險得多。（多間受訪巴士公司都有相同講法）
日本傳媒記者表示，即使各間巴士公司都知道有問題，相信仍然有好多呢一啲EVMJ提供嘅電動巴士係喺完全未採取任何應對措施嘅情況下繼續營運——其中包括曾經發生失控事故導致有乘客重傷嘅同型號威馳騰小巴。
至於進口並且銷售呢啲電動巴士嘅EVMJ，其實已經明知佢哋交付嘅電動巴士有「失控」問題，關東地區發生嘅嗰一宗事故其實屬於嚴重事故，仲導致有人骨折需要長期住院治療，但係EVMJ內部並未分享任何訊息，甚至連內部溝通都無。
對於佐藤辭去社長一職，員工難免對佐藤嘅所謂辭職表示擔憂：「雖然佐藤表示卸任，但仍然以『技術顧問』身份留喺公司。佢可能唔認為自己應該為忽視技術故障問題負責。有人認為佢打算低調行事一排，等待公眾輿論平靜返之後再重返社長職位。」
最後，根據日本《自動車事故報告規則》第2條第3號，導致嚴重人身傷害嘅車輛失控事故屬於必須通報。然而當日本傳媒記者向關東交通局查詢，關東交通局只係表示：
請正式申請公開相關信息，以便了解已提交嘅事故報告類型。
官僚…真係無國界。
Be the first to comment