背景
新鴻基地產早喺1990年代開始大量囤積西貢北部西沙路十四鄉一帶嘅農地，務求發展佔地76.4公頃嘅超大型住宅項目。輾轉經過多年同政府各個部門以及地區人士嘅角力，新鴻基地產分別喺2018年以及2021年分兩次合共補地價近200億港元，成功換取興建9500伙住宅。
十四鄉發展項目除咗有住宅物業之外，仲涵蓋康體設施，當中戶外體育及康樂用途場地會喺 2024 年上半年陸續啟用，唔同類型嘅體育場地以及商業設施都會開放畀公眾使用，至於住宅項目就預計 2025 年起分階段入伙。
首批專營巴士路線
因應十四鄉未來人口增長、配合十四鄉發展項目嘅乘客需求，運輸署2023年初喺《2023-2024 年度巴士路線計劃》中落實為十四鄉招標開辦5條專營巴士路線（「5條已規劃巴士路線」）往來下列地區：
- 馬鞍山市中心
- 沙田
- 荃灣
- 尖沙咀
- 九龍灣
運輸署喺2023年9月確認：
城巴有限公司成功投得上述「5條已規劃巴士路線」嘅專營權
奇異嘅反響
然後…
神奇嘅事就發生喇！
多個香港本地「財金演員」社交媒體專頁都「不約而同」咁喺極短時間之內「不約而同」咁對運輸署批出「5條已規劃巴士路線」畀城巴表達不滿，而且引用嘅理由都「不約而同」咁係運輸署之前批出屯門皇后山菁田、和田嘅巴士路線畀城巴一事。
坊間對呢種「搖鈴犬」式條件反射嘅不滿意見，即刻就聯繫返上去十四鄉發展項目嘅地産商新鴻基地產——香港另一間專營公共巴士公司：九龍巴士，正正就係同一個集團嘅子公司，所以：
「自己個發展項目門口竟然唔係自己旗下九巴做返？掟錢抹黑城巴先！」
如斯一說甚囂塵上。
再批專營巴士路線
其後，運輸署為咗「打圓場」，搬出「收到唔少地區人士反映希望增設往來十四鄉以及大學站/大埔區巴士服務嘅意見，以方便前往十四鄉使用康樂以及體育設施嘅乘客接駁東鐵綫服務往返港島以及新界各區」呢個理由，加上「根據最新嘅項目發展資料，嗰個項目入面嘅康樂同埋體育設施將會在啓用後提供不同類型及規模的文娛康樂及體育活動」…話經審視項目嘅最新發展情況並研究有關意見後，進一步「優化」十四鄉嘅巴士服務（「2條新規劃巴士路線」）：
- 增設一條往來十四鄉以及白石角嘅專營巴士路線（批畀城巴）
- 增設一條往來十四鄉以及大學站嘅專營巴士路線（批畀九巴）
上述「2條新規劃巴士路線」定喺2024年第2季開始投入服務，以配合十四鄉發展項目 當中嘅康樂及體育中心落成啓用時間——「5條已規劃巴士路線」當中往來十四鄉以及馬鞍山市中心嘅巴士路線亦都會安排喺同一時期率先投入服務，而其餘4條十四鄉往來沙田、荃灣、尖沙咀、九龍灣嘅巴士路線就會視乎十四鄉發展項目嘅設施幾時啟用以及屋苑入伙進度而喺適當嘅時候開辦。
新發展項目嘅開始成形
由新鴻基地産發展嘅十四鄉發展項目喺2024年3月正式公布命名為「西沙GO PARK」，設計由全球知名、以往作品包括中環The Henderson以及紅磡香港理工大學賽馬會創新樓嘅建築事務所Zaha Hadid Architects操刀，以未來社區概念建築，將人文、環境以及建築無縫融合，用上流線形設計加上幾何美學嘅建築規劃，展現多層次景觀，為運動、娛樂、餐飲、文化同埋休閒提供充足嘅開放空間以及多功能配套設施。
公眾喺天台嘅高架公園可以欣賞西沙自然景觀以及戶外大型體育設施全景，而中央廣場以橋樑連接運動、餐飲、娛樂等多功能設施，營造出充滿活力嘅氣氛。同時兼顧可持續效能，重視加入綠色植物以及四季花卉嘅園境概念，成為當區新地標。
專營巴士路線準備首航
「西沙GO PARK」其中運動商業綜合部份總面積約30萬平方呎，預計第一階段大約20萬平方呎嘅部分會喺2024年第2季落成。所以時間去到2023年4月中旬，九巴同城巴就各自發出新聞稿，指出第一批合共3條十四鄉發展項目嘅專營巴士路線都會喺2024年4月28號首航。
九巴287號路線（十四鄉←→大學站）
城巴581號路線（十四鄉←→馬鞍山市中心）
城巴582號路線（十四鄉←→白石角）
服務開辦初期，呢3條專營巴士路線嘅十四鄉總站 / 折返點係會使用設喺海映路嘅路邊巴士停車灣上落乘客。運輸署以及巴士公司會密切留意呢3條專營巴士路線自服務開辦後嘅運作情況以及乘客需求，有需要時調整相關巴士服務安排。
九巴、城巴各自提供特色
「西沙GO PARK」標榜設計融合自然環境，而所用嘅商業模式又連繫到運動項目，九巴同城巴喺開辦以上所講呢3條專營巴士路線嘅時候，都各自融入咗相關嘅元素喺佢哋嘅首航宣傳入面。
其中九巴就話會安排比亞迪雙層電動巴士行走 287 號路線，為乘客帶嚟寧靜、零車身排放嘅舒適車程云云。
咁其實即係無乜新意啦！
至於城巴方面就比較進取，宣傳海報用上咗「一呼一吸新旅程」做口號，插畫亦都帶出咗馬鞍山以及西沙一帶適合香港市民前往郊遊嘅特色。
用車方面，城巴依然係揀選富豪B8L型雙層巴士，呢一方面相信對一眾巴士迷嚟講，毫無疑問真係了無新意㗎喇！
但…近年銳意革新自己嘅城巴又點會咁簡單呢…
城巴與香港本地共享單車龍頭Loco攜手合作，破天荒推出全香港首個「巴士 × 單車轉乘」計劃，進一步擴大交通連接網絡。顧客乘搭城巴後轉踩單車，方便快捷之餘更有益身心。顧客可以用優惠價加入不同計劃，無限任踩Loco共享單車。
城巴表示，吐露港一帶向來都係香港人踩單車熱點，Loco共享單車近年亦已經成為部分沙田同埋大埔居民綠色出行唔可以缺少嘅一部分。城巴連同Loco嘅嶄新轉乘計劃，既推動市民已更環保嘅方式出入之餘更加係有益身心，有望可以為居民提供公共交通，無縫接駁共享單車嘅便捷途徑。
Be the first to comment