香港本地女子組合COLLAR自2022年1月12號夜晚六點半，喺尖沙咀海運大廈天台宣佈出道後，至今日已經成軍一週年！大家由《全民造星IV》睇住8位成員喺96人之中脫穎而出成為COLLAR一分子，再喺出道之後呢一年陪住佢哋起起跌跌，Fans心入面一定係有好深嘅感受。
喺新嘅一年，COLLAR撥走灰暗再出發，喺今日成軍一週年嘅日子除咗喺西九龍文化區發佈新歌「The Bright Side」之外，應援巴士「The Bright Side號」亦都喺今日舉行啟航禮，聽日起開始逢星期五、六、日喺H1線接載乘客，穿梭維港兩岸。
披上灰白色車身廣告嘅「The Bright Side號」一共有兩部，分別係新巴Alexander Dennis ENVIRO 500 開篷巴士 #5550 同 #5552，兩部車都裱上相同嘅廣告。廣告以COLLAR 8位成員步向光明為設計，灰白漸變嘅底色，加上8位成員：芯駖、Day、Candy、Ivy、Marf、So Ching、Winka 同 Gao 由右向左前行嘅動作，滿滿覆蓋住全個車身。而車頭同車尾都有新歌「The Bright Side」嘅名稱同標誌，睇落相當簡潔。而車內亦都貼有各成員嘅肖像，俾乘搭嘅Fans打卡留念。喺今日啟航禮上，Day已經急不及待喺IG Story上影低咗車內嘅佈置俾大家率先收睇。
而啟航禮前，人力車觀光巴士已經先安排其中一部「The Bright Side號」#5552 喺尖沙咀鐘樓下俾一眾「領粉」同巴士迷拍攝。喺下晝四點過後，另一部「The Bright Side號」#5550 就載住COLLAR 8位成員，徐徐駛入尖沙咀碼頭巴士總站，各成員分別向兩旁守候嘅Fans同傳媒揮手，現場情緒隨即推向頂點。
喺傳媒朋友登上咗「The Bright Side號」#5552後，兩部應援觀光巴士就隨即出發首航。巴士沿彌敦道北行，當駛到旺角豉油街街口時，更特意慢駛，俾COLLAR 8位成員可以同成員之一嘅Candy生日應援廣告拍攝合照。然後巴士就經連翔道駛向西九文化區，帶八位成員出席喺藝術公園大草地舉生嘅新歌發佈會。
大約五點左右，兩部巴士抵達西九文化區，現場已經有數百名Fans喺大草地等候COLLAR到臨，COLLAR 喺落車後到後台稍作準備後，就隨即開始新歌發佈會。大約15分鐘嘅表演後，COLLAR話今次新歌「The Bright Side」嘅形體舞蹈方式表演只此一次，因為場地同表演心態都一不可再。如果錯過咗嘅朋友，即管上網搵搵會唔會有現場片段流出啦！而新歌將會喺聽日1月13號中午十二點喺叱咤903《叱咤樂壇》節目內作全港電台首播，下晝一點起就會喺各音樂平台上架。
1 Trackback / Pingback