比利時法院正式頒令 VanHool 破產清盤

因城巴於1990年代引入 Volvo B10M 豪華旅遊巴士而為本港巴士迷認識嘅比利時巴士製造商 VanHool NV，比利時佛萊明區 (Flemish Region) 商務法院於當地時間 4月8日早上09:30 正式頒令破產清盤，並指派荷蘭 VDL Groep 及德國 Schmitz Cargobull 為臨時接管人。兩間公司表示將合共接收約950名員工，意味於高靈桑 (Koningshooikt) 總部有1500人失業，當然仲有北馬其頓廠房逾千名工人丟飯碗，與及北美廠房計劃胎死腹中。

據比利時當地傳媒報導，VanHool 的債權人經過近半年交涉及委託律師進行仲裁尋求解決財政危機，本來於一月「救命CEO」Marc Zwaaneveld 履新後提出包括遷移巴士生產線至北馬其頓等多項重組計劃該出現轉機，可是會計帳目有大量難以釐清嘅疑點，與及關於重組後 VanHool 家族於公司內嘅角色等問題未能取得明確共識；更是有報導指 VanHool 家族成員一直循會計帳目挪用公司資金而導致財困，且疑因對於業務重組之後難再「穿櫃桶底」而對仲裁機構擺出不合作姿態，銀行、供應商等債權人唯有入稟法院要求將 VanHool 清盤，冀迫使 VanHool 家族就範，或是來個了結。原本在上月28日宣判頒令，但總裁 Filip VanHool 及 Marc Zwaaneveld 等高層透過代表律師向法院表示「俾多一個星期時間過我哋」，法院及各債權人同意而押後至噚日。據報呢大約十日時間，Filip 希望成功游說啲叔伯兄弟與及啲「黃馬褂」接納重組計劃，但結果如今都無需多講。

事實上，4億歐元債務相對於 VanHool 嘅業績算不上大數目，走上倒閉之路確有點可惜。但本台駐倫敦特派員 MC Chau 直言「VanHool 啲車又唔係好，價錢又唔係特別『筍』。淨係睇吓 National Express 以前用好多 VanHool 但依家想搵部睇吓都難」「唔好話大陸車、土耳其貨爭晒啲市場，點解 NE 轉晒用 Plaxton、或早幾年用葡萄牙殼 (Salvatore Caetano) 先得㗎？」

的而且確，VanHool 除咗其「獨門秘方」的一層半 (即駕駛室與乘客區分為兩層) Altano 系列之外 (Plaxton 幾年前亦已推出類似設計)，其餘型號單純於西歐品牌尚有選擇，除咗前段提及的，尚有較多港人知曉嘅 Irizar；或是同樣 Monocoque 結構就有沿襲自 BOVA 嘅 VDL Futura，財力豐厚一啲嘅仲有 Setra、Benz、Neoplan 可以選擇。也許解釋到 VanHool 一直只係在市場狹縫「吊鹽水」續命。

承如早前報導預計 VDL 及 Schmitz Cargobull 誓必將 VanHool「肢解」。法院頒令後兩家公司亦清楚表明確實如此做。VDL 將接收巴士製造部門，預計接收不多於600名員工；Schmitz 則接收拖架部門，接收350名員工。高靈桑 (Koningshooikt) 總部原有僱員人數約2400人，涉及到失業危機，政府方面當然頭都痕。的確，尚有報導提及，高靈桑 (Koningshooikt) 所屬嘅利爾市 (Lier) 以至安特衛普省政府曾考慮出手拯救，但一方面涉及到公共財政支出，衍生嘅程序無可能短時間內處理；另一方面，由於重組計劃包括將巴士生產移離比利時，意即無助解決就業問題，政府更是不可能插手 (否則必定被狂毆)。意即 VanHool 只能進入寧養病房 ─ 等死是也。

雖然法院已經頒令，但可能有「程咬金」出現。於去年12月接管英國 Mellor、曾為 ZF 母公司嘅汽車及機械工業巨頭 Guido Dumarey 於當地時間昨日下午突然向法院及安特衛普省政府表示願意提出比兩間公司更優厚條件接收 VanHool，其一就是「維持職位數目至1800個」。成事與否有待法院是否接納而重審。但無論如何，呢間75年歷史嘅老字號正式告終是無法扭轉嘅事實。

回顧過去十多年，Berkhof、Jonckheere、Noge SL 等相繼倒下，據聞 Beulas 如果 Jewel E 計劃未能實現的話都可能危危乎，到底巴士製造呢樣「勞動密集」嘅工業轉去低勞工成本國家係咪出路呢?? 不過可以肯定，VanHool 嘅巨量冗員同家族成員嘅貪婪就是呢間老字號倒下嘅主因。