西班牙 Sunsundegui 申請清盤破產

繼比利時 VanHool 之後，再有歐洲巴士製造商瀕臨倒閉。具有80年歷史，位於西班牙巴斯克地區納法羅亞省 (Naffroa) 艾莎素 (Altsasu) 近年主力夥拍富豪 (Volvo) 嘅巴士車身製造商 Sunsundegui 申請破產清盤。綜合外電報導，Sunsundegui 負債約5千萬歐元 (折合港幣 4.4億元)，債權人除咗零件供應商，提供融資的銀行的債務比例佔八成。雖然 Sunsundegui 預計明年訂單完成交易後可以償還大部份債務，但由於欠缺足夠流動現金償付到期應付賬及維持正常營運暢順，唯有申請清盤破產，預計約300名僱員生計不保。

根據包括西班牙當地及歐洲多間傳媒報導，Sunsundegui 自從武漢肺炎以來已出現財政困難，欠缺足夠流動資金應付訂單生產嘅零件採購需要，導致訂單數目持續下跌，並因為市場競爭導致收益利潤未能充份應付人事開支。其財務顧問畢馬威會計師行 (KPMG) 則向傳媒披露，於2023年初已建議 Sunsundegui 精減人手 (即係裁員) ，但未有確實執行，更是到2024年初，為準備與富豪車廠的合作計劃，在未達成協議前已增聘近150名工人。

富豪於今年5月宣佈停止製造巴士整車，並將 9700 及 9900 兩款旅遊巴士車身向 Sunsundegui 作技術授權，理論上該可以渡過難關，但富豪廠方突然於7月宣佈終止計劃，縱然維持與 Sunsundegui 作為「授權車身建造商」的合作關係，Sunsundegui 可謂「萬事俱備，突然被一鑊翹起」受到嚴重衝擊；加上富豪另一邊廂明言加強與埃及 MCV 於旅遊巴士業務嘅合作，管理層在與納法羅亞省經濟及商業發展部長邁卡伊魯祖 (Mikel Irujo) 商討過之後，認為政府難以繼早前提供900萬歐元資助後再提供財政支援，唯有將公司申請清盤破產。

本台整理資料發現，除咗由武肺疫情以來先後有 Noge S.L. 及 VanHool 之外，近十多年來歐洲多家巴士製造商倒下，包括曾有銷售來港嘅葡萄牙 Alfredo Caetano，Berkhof (連同早已收購的旗下嘅 Jockheere) 與及Bova 終被 VDL 整合品牌而正式消失，歐洲嘅巴士工業可謂進入寒冬。歐洲汽車傳媒分析認為，歐洲經濟未有高速騰飛，加諸來自土耳其、中国等嘅產品以低價招徠，連底盤計算整車總價有逾兩成嘅折讓，而質素、可靠性仍保持於可接受水平，確實對歐洲嘅巴士製造業造成衝擊。承如早前對 Vanhool 倒閉所作嘅分析，呢類「勞動密集」嘅工業存在嘅成本問題，响西歐嘅生存空間，似乎真的未能樂觀。