VanHool 已申請破產保護，傳荷蘭 VDL 有意接管

早前報導 VanHool 擬遷移巴士生產線至北馬其頓並裁減近千個職位圖扭轉困局，十多日過去，事件急速扭轉。綜合歐洲當地消息，VanHool 被揭負債逾二億歐羅 (有指更高達四億)，家族成員對於業務重組計劃刁喬扭擰，見頹局似難以收拾，只好進行清盤並申請破產保護尋求買家注資收購或接管。

據比利時當地傳媒及歐洲巴士新聞網站，VanHool 嘅財政狀況一直唔算太穩健，自武肺後更如雪上加霜。原本在1月履新的副總裁Marc Zwaaneveld  有完善計劃，希望降低巴士業務成本，並維持已獲取訂單的交貨安排保持足夠現金流，無奈 VanHool 僱員數目高達 4300 人，相對於 full power 產能每年 1500 部巴士與及 3000條拖架，本已嚴重人力過剩，更可況近三年嘅銷量未及 50% 產能，早已經元氣大傷。縱使工會終肯面對現實接受裁員計劃，但比利時的 VRT NEWS 暗示 VanHool 家族成員未肯同會計師等合作，無奈只好申請清盤及尋求買家。

具有75年歷史嘅 VanHool 可會從此消失，還看有無白武士。據傳有三間公司正在考慮，當中包括荷蘭嘅VDL、德國嘅拖架製造商 Schmitz Cargobull，另外仲有 MAN Truck & Bus。

明顯地，Schmitz Cargobull 將聚焦於拖架業務；VDL 本身唔止造巴士嘅 VDL Bus & Coach，整個集團業務相當多元化，該有足夠財力接管巴士業務甚至全面接管。但回顧 Berkhof、Jockheere 兩家巴士車身廠被 VDL Groep 收購後都全面消失，只餘下 BOVA 呢個牌子嘅產品 re-brand 成 VDL 繼續生存，恐怕 VanHool 若落入 VDL 手上也難逃一劫，極其量只剩下 VanHool 獨家的「一層半」嘅 Altano 系列。

至於如果買家是 MAN 的話，始終旗下嘅 NEOPLAN 從來集中於 High-ranking 市場，MAN 自家嘅旅遊巴產品於歐洲中價市場相對比較冷門，理論上 VanHool 可以填補空間。可是 MAN 本與土耳其 Temsa 過從甚密，而母公司 TRATON 之下又有 Scania 與 Irizar 長期緊密合作。於 VanHool 而言，形勢只比 VDL 好少少。

但無論如何 VanHool 倒下似乎已成定局。而據有關家族成員的態度的報導，可會意味著所謂中國傳統智慧之「富不過三代」乃放諸天下皆準？或者看著 IRIZAR 响 1991 年經歷過破產清盤危機而其家族成員願意「放手」，對 Filip VanHool 同啲叔伯兄弟走著看。