九巴推廣綠色運輸 3月26號請大家搭「指定嗰一架」巴士

九龍巴士（一九三三）有限公司（「九巴」）表示致力拓展環保車隊，近年自行研發安裝喺巴士車頂嘅太陽能裝置，號稱可以有效減低耗油量，除咗持續為現役巴士加裝太陽能裝置，仲將太陽能裝置列做新購置巴士嘅標準裝置，為香港實現碳中和作出貢獻。九巴嘅目標係2023年內增加到2000架巴士——即係一半車隊配備太陽能裝置。

為咗宣傳「太陽能巴士」減碳節能嘅成果，九巴特別設計主題巴士，喺2023年3月26號（星期日）舉辦「免費乘車日」，畀乘客去到郊外感受綠色大自然。當日九巴96R號路線所有班次都會安排由配備太陽能裝置嘅巴士行駛，全港市民當日可無限次免費乘搭行走九巴96R號路線 （鑽石山站←→黃石碼頭）——不過就好似上次1A號路線咁，要指定係嗰一架太陽能主題巴士（12米版本E500型雙層巴士，車隊編號：ATENU1326，車牌號碼：VG6020）。

嗰一架太陽能主題巴士預計班次時間表

開出地點	開出時間
鑽石山站	0900、1330、1630
黃石碼頭	1030、1500、1742

九巴96R號路線由鑽石山出發，途經彩虹、牛池灣，市民可於活動當日，乘搭上述指定巴士後毋須繳付車資，暢遊有「香港後花園」之稱嘅西貢。九巴會預留車務資源、加派外勤人員，並且會喺車頭位置提示乘客享受免費乘車體驗。

九巴副車務總監（巴士維修及工程）黃健輝表示：「九巴舉辦免費乘車日，希望畀市民更了解我哋自行研發嘅太陽能裝置巴士，並且分享九巴應用創新科技減碳節能嘅成果。」

九巴工程師團隊早喺6年前開始自行研發太陽能裝置，經過不斷測試同埋改進，依家已經發展成第3代太陽能薄膜，持續為現役車隊加裝。此外，九巴同巴士生產商溝通以及研究，落實設計同安裝太陽能裝置巴士會成為新購置巴士嘅基本裝置。

九巴目標係2023年內增加到2000架巴士，即係大約一半車隊配備太陽能裝置，並且爭取喺2040年全線車隊採用新能源巴士，與此同時積極減低車隊營運時嘅碳排放。

九巴自行研發備有太陽能裝置嘅雙層巴士，當巴士停車熄匙，而車廂溫度超過攝氏35度時，就可以用太陽能供電驅動通風系統，有效將車廂溫度降低攝氏8~10度，系統亦會供電畀車廂冷氣系統嘅風扇以及一啲乘客設施，每架巴士每日可以慳到5~8%耗油量，相等於每年每架巴士減少約6噸碳排放。

九巴另一個成功減碳設計就係巴士專用並且安裝喺巴士落車門位置嘅「環保風閘」，有效保持車廂溫度，減低冷氣系統的耗油量。測試顯示，當車外氣溫攝氏32度嗰陣，加裝風閘後，落車門附近嘅溫度，相比無安裝風閘嘅巴士低攝氏4度。

此外，九巴有30架純電動單層巴士已經投入服務，為市民提供零排放、寧靜嘅乘搭體驗。九巴首架純電動雙層巴士亦已經喺2022年12月運抵香港，預計2023年內有52架純電動雙層巴士可投入運作，目標係喺2027年增加到有500架電動巴士，帶領香港公共運輸業邁向綠色新時代。