由1982年開始，「東尖沙咀地產發展商聯會」主辦嘅「閃爍尖東耀香江」活動到咗2022年已經係踏入40週年，尖東嘅聖誕燈飾多年嚟點亮維多利亞港，區內尤其係海濱長廊一帶嘅多棟大廈外牆燈飾喺2022年11月29號傍晚開始同時亮起，希望喺即將來臨嘅聖誕新年假期為市民增添歡樂。
「東尖沙咀地產發展商聯會」主席邱文華先生就話：「衷心感謝聯會會員多年嚟支持同貢獻，40年嚟嘅尖東璀璨燈飾為無數市民以及遊客帶來難忘嘅體驗、盛載住幾代人嘅豐盛回憶。希望香港市民能夠喺尖東海濱長廊嘅公共空間欣賞尖東燈飾嘅光芒，成為一家以至摯愛好友嘅溫暖回憶。社會經歷咗疫情嘅挑戰，尖東燈飾除咗照亮維港，亦希望向大家傳遞愛與溫暖，為市民送上祝福，令喜悅以及關愛散發到每一個角落。」
2022年有參與「閃爍尖東耀香江」嘅尖東地標包括：
- 麼地里
- 尖沙咀中心及帝國中心
- 帝苑酒店
- 麼地道沿路3條行人天橋
- 南洋中心
- 永安廣場
- 千禧新世界香港酒店
- 九龍香格里拉酒店
- 富豪九龍酒店
- 海景嘉福洲際酒店
燈飾會分為兩個時段做主題，每晚1730~2300時著燈：
- 聖誕燈飾：2022年11月29號~2023年1月1號
- 農曆新年燈飾：2023年1月16號~2023年2月5號
如果大家覺得靠自己對腳行尖東睇燈飾會好容易覺得攰嘅話，2022年繼續會有旅行社安排開篷巴士途經尖東嘅燈飾區。
其中特別安排搞尖東燈飾團嘅包括國聯、東洋、新輝呢三間有自己開篷巴士嘅旅行社，而平時已經喺香港進行本地開篷巴士遊嘅 Big Bus Tours，亦會喺聖誕佳節安排夜遊路線去到尖東帶乘客欣賞燈飾——據講佢哋仲繼續會特別安排行程喺摩地里停低幾分鐘畀各位乘客打卡。
當然，「聖誕女郎」係要自備嘅！
2 Trackbacks / Pingbacks