因為颱風「暹芭」逼近廣東西部沿岸，香港天文台喺2022年7月1號1910時發出8號烈風或暴風信號，絕大部分香港境內嘅公共巴士服務停頓。而當颱風喺中國廣東茂名電白一帶登陸之後，風暴對香港嘅威脅逐漸消失，香港天文台喺2022年7月2號1620時改發3號強風信號，香港各間主要公共巴士公司都陸續恢復服務。
堵塞通道？
多年以嚟，位於尖沙咀九龍角嘅天星碼頭都係唔少鍾意睇打風、睇大浪市民習慣去嘅地方，以往都曾經因為有唔少揸車去睇打風大浪嘅市民遲咗揸走自己嘅車而影響到公共巴士恢復服務。
所以後嚟巴士公司以及警方都會提早派人去到尖沙咀天星碼頭，嘗試聯絡泊低咗架車嘅司機及早揸走自己架車。
只不過咁，即係呢，世事唔會咁完美嘅，有時候堵塞巴士總站嘅，唔一定係大家以為嘅私家車司機——其實可以係巴士佬自己友嚟㗎喎！
隨著香港天文台改發三號強風信號之後，九巴就宣布喺2022年7月2號大約1730時恢復公共巴士服務。為咗達到呢個目標，當然巴士車長就要提早揸晒啲巴士去到總站準備開出…但係…如果同一條路線個個車長都一齊揸咗啲巴士去同一邊總站，咁就會自己人塞死自己人囉！
係呀，呢一日喺尖沙咀碼頭巴士總站就係發生一件咁嘅事：九巴1A號路線成堆巴士一齊嚟到尖沙咀碼頭巴士總站，塞滿成條「車坑」之後都仲有準備服務同一條巴士路線嘅巴士嚟緊。
結果遲嚟嘅巴士咪入唔到條車坑囉！
入唔到條車坑咪頂返出去揸入巴士總站嗰條路囉！
咁咪即係巴士佬自己塞死返巴士佬嘅去路囉！
咁當然人作為一種「高智商生物」就會識走棧嘅：叫前面車坑最前排嘅巴士早啲開出咪得囉！咁事件都係擾攘咗5分鐘左右到啫！
撞鬼爛嘢？
擰轉個頭睇一睇…喺同一個巴士總站就有另一單比較神奇嘅事情發生咗：
颱風「暹芭」襲港期間，尖沙咀警署嘅警員巡經尖沙咀天星碼頭巴士總站，發現位於尖沙咀九龍角天星碼頭7 -11便利店對開嘅行人通道上蓋有1塊金屬片損毀，幾粒用嚟固定呢塊金屬片嘅螺絲跌到一地都係。
當然盡忠職守嘅警察一定要做返應該做嘅事嘅，咁佢哋就搬咗兩個「雪糕筒」嚟，再拉起咗封鎖線，提醒使用尖沙咀碼頭巴士總站嘅巴士車長、乘客，以及其他路人，要小心留意有損毀咗嘅金屬片掛喺個頂度。
而且警員仲為今次金屬板損毀嘅事件備案，亦都抄低咗佢哋嘅報案編號，貼咗張通告希望呢個上蓋嘅負責人見到張通告之後，可以聯絡返尖沙咀警署跟進。
但諗嚟諗去，尖沙咀九龍角碼頭同埋側邊成個巴士總站實際嘅業權人應該係香港政府，呢啲方便行人來往碼頭同埋巴士總站嘅上蓋，似乎應該係政府公物嚟㗎喎？！
唔知道相關嘅政府部門會唔會留意到呢件事盡快跟進作出維修呢？
仲有順帶一問：
- 究竟係唔係啲野鴿打風嗰陣自己撞埋去撞爛咗塊金屬片呀？
- 定係邊個巴士車長自己失手撞爛㗎？
後者嘅話，襯人少少認咗佢？
Be the first to comment