匯達交通（Bravo Transport）今日下午喺城巴柴灣車廠天台舉行咗一場閉門發佈會，介紹全港首部電動雙層巴士－威馳騰 WSD6121BR1EV。新巴士由威馳騰（福建）汽車有限公司聯同匯達交通著手設計及生產，以配合香港營運環境及路況。
車身採用高強度複合物料以及不鏽鋼製造，全車淨重近 17 噸。透過安裝喺右邊車尾同尾跨位置，容量達450kwh 嘅磷酸鐵鋰電池，驅動中軸兩邊嘅 ZF AVE130 輪邊摩打，每個摩打產生最大功率 125kw，換算合共約320匹馬力。最高續航里程 230 公里，而使用 150kw 快充，只需要大約 3 個鐘頭就可以將電池充滿。
為達到宣傳效果，巴士裱上以深藍色同天藍色調為主嘅全車身廣告，並冠以 ELECTRICitybus 嘅名稱，突顯佢係全港第一部電動雙層巴士嘅分份。盡管筆者覺得包埋窗柱嘅「SuperBus」全車身廣告真係唔好睇，但係對比早幾日首航嘅九巴比亞迪 K12A「電光綠」塗裝，匯達交通喺呢部威馳騰電動雙層巴士上嘅廣告設計的確係比對岸嘅公司嚟得更矚目！
匯達交通營運及工程總監馮家輝先生表示，新巴士會喺五月到各區同市民見面，其後會喺城巴路線 5B 同 22M 進行測試，測試成功後先會正式載客。
講返個發佈會，匯達交通請嚟即將卸任，「夠鐘返屋企」嘅行政長官林鄭月娥擔任嘉賓。可能因為保安問題，大會只容許事先獲邀傳媒出席。其中有關汽車或者公共交通嘅傳媒或者網媒完全欠奉，大家只能夠透過直播得知發佈會內容。而城巴新巴網頁同 Facebook 專頁喺發佈會後都未有發佈官方資料或者相片，所以喺「一相難求」嘅情況下，有唔少友台都以直播截圖、鄰近大廈遠攝等方式去取得帖文配圖。喺公關上，似乎反而對岸公司做得比較好喇⋯⋯
另外，匯達交通亦喺發佈會上宣佈啟動名為「#Mission Zero」計劃，目標喺 2045 年全線車隊採用零排放巴士。此外喺今年七月，亦會購入全港首部氫能巴士，到時會同電動巴士一齊進行測試。測試結果將會作為決定日後增購零排放巴士種類嘅參考。
延伸閱讀：
Be the first to comment