巴士無尿入，要收車停駛？

車用尿素 (AdBlue) 供應短缺問題已經唔再係某啲「十九評論員」唯恐天下不亂嘅廢噏，而且受影響嘅地方唔止香港，仲起碼有南韓、台灣。

乜嘢係 AdBlue？點解要入？唔入會點？

或者先簡單講解車用尿素係乜嘢一回事。由 Euro 4 排放標準實施開始，絕大部份嘅柴油車 (不論私家車、貨車、巴士)，都要入 AdBlue，原因係予車上一個簡稱SCR嘅設備分解引擎廢氣中嘅氮氧化物 (Nitrogen Oxides，稱稱NOx) 改善排放污染。AdBlue 主要有效成份就係尿素，濃度32.5%；加上成份「超純」要求，雜質比例低於0.5%，所以唔可能以大家去洗手間排放出嚟嘅液體直接使用或作為原材料。

為咗杜絕司機或車主「出蠱惑」，歐盟議會當年制訂 Euro 4 排放標準嘅同時訂立另一套法規，要車上裝有電腦監察系統 OBD，確保車輛必須注入 AdBlue 先可以行車。當 AdBlue 缸存量低於15% 就會提示司機「入尿」，唔入或作弊入咗其他液體例如清水就會「鎖車」限制引擎動力輸出，甚至死火後無法重新撻車。

九巴表示 AdBlue 供應存在風險

本台上週初已收到運輸業界報料指個別商號 AdBlue 售罄，或收到供應商提醒「最好入定多啲貨」。但經進一步調查發現「無貨」非全港性，故此「睇定啲」同業界保持溝通。日前終有本地傳媒作出報導，另有報導提及南韓直情「出大事」緊急救援車輛要停駛，台灣的 AdBlue 生產商亦宣佈供應緊張而要上調售價約一成，幾可肯定問題開始惡化。

巴士公司當然會受到牽連，本台分別聯絡九巴及城巴、新巴母公司匯達交通查詢了解，唯只有九巴透過書面作簡單回覆，表示 AdBlue 供應存在風險，並已聯絡特区政府要求協助與「內地」當局斡旋。但到底仲有幾多存貨可以俾四千部巴士捱到幾耐就未有交代。

言下之意，巴士公司可會突然無預警地「收車大法好」，當然唔希望發生，亦合理地相信唔會發生。但政府可會藉機全力宣教「除了鐵路以外你們不可以有別的交通工具」，或者可能比較難講。

本台另外聯絡多個零售集團以了解其情況，稍後可能在 HK Car Channel 作出報導。

宏觀而言，AdBlue 供應短缺問題該屬短期性，多個銷售商號亦已著力進行採購、搜羅新貨源。

目前本港銷售嘅 AdBlue 主要來自中国，另外仲有台灣、澳洲、拉脫維亞。中国已宣佈實施尿素原材料及 AdBlue 等高濃度製成品出口限制，運輸業界到底又為「祖国」準備宣揚「拯救香港」還是開拓貨源，相信大家都WFC，因為香港人最緊要有車搭(返工)。