【日本】擅闖路軌拍片 「鐵膠」送官究治

隨著互聯網發展，唔少人都希望可以喺網絡上「威畀人睇」，致使「不良交通迷」其實已經唔係個別地區嘅問題。

日本近年多次有「鐵膠」為咗拍攝一啲比較「震撼」嘅畫面而擅自走入禁區，既妄顧危險，亦影響到公共運輸服務。

其中喺當地時間2021年4月1號下晝大約1510時左右，大阪市旭區嘅京阪本線森小路車站就有一班為數大約30人嘅「鐵膠」由月台擅自走入路軌範圍，並且利用智能電話拍攝途經嘅列車。

由拍攝到嘅影片可以見到，列車司機發覺有人擅闖路軌範圍之後，響咹並且緊急煞停列車，而呢班「鐵膠」亦四散。幸好事件中無人受傷，但仍然令部份列車延誤達5分鐘。

大阪府警察經調查後，搵到拍攝呢段影片嘅19歲無業少年。根據口供，呢名少年話「唔想輸畀其他鐵路迷」，認為「咁樣拍攝行緊嘅列車有型兼靚過就咁企喺月台影」。

大阪府警察喺2021年11月10號表示，已經喺11月9號根據《鐵道營業法》將呢名少年移交家庭裁判所。

針對呢單案件，京阪電鐵回應當地傳媒時只係表示：「切勿做出威脅安全嘅危險行為，例如走入路軌。」