「警署」門前燒九巴 幸好乘客無受傷

2021年2月9號朝早9點幾，九巴1架富豪B9TL型12米版本雙層巴士（車隊編號：AVBWU773 ，車輛登記：VH3902）正行駛緊681號路線前往中環（香港站），去到近灣仔時車尾突然冒煙。

巴士車長臨危不亂，將巴士泊入舊灣仔警署門外嘅巴士站，並且開始疏散乘客。然而，巴士車尾未幾即起火焚燒。

巴士車長曾經試圖用巴士上嘅滅火筒救火，奈何火勢太大，未能成功。

當局0936時接獲「車輛起火」報案後，灣仔消防局隨即調派1架泵車、1架救護車趕赴現場，而警方港島交通部、港島衝鋒隊、灣仔分區亦調派警員協助交通管制。

消防員到場後，即時開動1條消防喉向巴士射水，好彩火勢好快被撲熄。

火勢熄滅之後，消防員打開巴士車尾嘅車身組件，繼續向巴士機件射水降溫。

九巴工程車喺朝早1005時到達現場，工程人員隨即接手檢查情況。

九巴工程人員亦拎出木糠，倒落路面吸走事件中由巴士漏出嘅油渣。

事件中，巴士嘅損毀都集中喺車尾，可以見到車身亦有被薰黑。

事後，九巴工程人員喺1103時用拖車將涉及今次事故嘅巴士拖走，返去巴士車廠作進一步檢驗。