傑出乘客唔守禮 雙腳常跨對面位

一直以嚟，「傑出乘客」（又叫「西客」、「咸魚」）都係一個巴士業內認為無辦法根治嘅麻煩問題，除咗因為常見、有一定數目、種類繁多之外，另一重點係「往往唔肯接受人哋嘅勸告」。

2020年11月21號夜晚8點幾，本台有一位讀者喺馬鞍山乘搭九巴81C號路線出尖沙咀嘅期間， 佢發現喺下層左側中軸同尾軸上方嘅面對面座位有一位白髮斑斑嘅男乘客。

本來有人喺巴士上面坐喺一個座位係好正常嘅事，只不過呢位讀者發現，嗰一位男乘客原本坐喺中軸上面靠車窗面向後嘅座位上，將自己對腳連鞋一齊擺上對面尾軸靠車窗面向前嘅座位上，呢位讀者作為一個良好市民當然即時勸告嗰位男乘客…

結果呢~~~~就如以上相片所示…

嗰位男乘客即時停止到佢原本嘅動作――不過就改為坐去尾軸靠通道面向前嘅座位上， 然後繼續將佢對腳擺去中軸上面靠車窗面向後嘅座位上，仲要擺出一副愛理不理嘅態度。

（其實嗰位男乘客又好似幾有道理：因為原本尾軸上面靠窗面向前嘅座位曾經被佢對鞋踩過，當然佢自己唔會坐返上去啦！）

近年社會上充斥著好多聲音，譴責一啲「為老不尊，教壞子孫」嘅年長人士叫做「廢老」，問題係佢吔除咗影響到社會運作之外，同時就係令到一啲本身仍然秉持「奉公守法、遵守道德」嘅老人家都無端白事被人錯誤以為係「廢老」嘅一員…公道咩？