2020年9月27號下晝，喺佐敦渡船角嘅一間糖水舖「糖水雄」嘅門外，連續兩三個鐘頭都有一班人排隊等候，不過佢哋唔係嚟買糖水，而係為咗支持一本香港人自資出版嘅日本鐵路遊記相集。
呢本名為《日鉄 旅の風景》嘅遊記相集，作者係網絡社交媒體專頁「Johnny鉄道撮影札記」嘅版主Johnny LI，而佢就係正正揀咗喺呢間糖水舖入面舉行一場簡單嘅簽書會。
根據佢自己嘅簡介，佢當年唔甘心坐喺辦公室每日朝九晚六點返工，結果自己走咗去讀新聞系，轉職做一個廣告攝影師。分手之後第一次自己一個人去日本四國旅遊，從此就愛上咗日本嘅火車，10年間佢走遍咗40幾個日本嘅都道府県，佢唔係立心要坐晒所有鐵路路線，而係希望喺呢個鐵道旅遊之中，搵返作為香港人能夠生存嘅一息自由空間。
作為網絡社交媒體入面一個鐵道專頁版主，Johnny當然認識唔少其他關於鐵路嘅專頁版主，喺今次嘅簽書會活動入面，佢哋大家都有嚟捧場。
至於講返本遊記相集，全書大約有160頁，收錄咗Johnny嘅11次日本簡單鐵道遊記，涵蓋北海道、東日本、中部、西日本，內容唔係圍繞喺鐵道嘅列車或者路線上面，而係鐵道旅行入面會探索到嘅一啲香港人好少留意嘅日本地方。
Johnny希望分享佢自己鐵道旅行嘅經歷畀大家，旅程無香港人最喜愛嘅購物打卡熱點，但想利用風光同埋山海嘅美麗，加上地道日本民間人情味，畀香港人知道旅行嘅意義其實係――切忌趕行程。
今次呢一本遊記相集係Johnny自資出版，由概念到成品只係用咗1個幾月嘅時間，好彩Johnny得到身邊朋友嘅幫助，令佢出到呢本咁有質素嘅遊記相集。
對於每本書所收到嘅港幣120蚊，佢坦言今次係「蝕大本」…但係佢仍然決定唔扣除任何成本，將今次本書賣出去所得到嘅收益全數捐畀支持抗爭者嘅基金，支援香港近年嘅民主抗爭運動。
當好多香港人都視日本係自己嘅「鄉下」，Johnny喺書入面嘅後記提出咗一個好重要嘅反思：應該唔少香港人好鍾意日本，仲認為自己對當地大小景點瞭如指掌…但係對自己居住緊嘅香港，又知道幾多呢？如果無社會運動，好多香港人可能對自己居住嘅地方毫不熟悉、可能未曾踏足過唔少香港地方、可能無留意過香港嘅過去或者細節…但其實…
香港係我哋嘅家
Be the first to comment