1941年12月8號，大日本帝國發動太平洋戰爭，日軍突襲美國珍珠港海軍基地之後短短幾個鐘頭，就執行南方作戰行動，攻打東南亞，率先入侵香港，香港保衛戰爆發。香港守軍雖然明知人數、裝備、補給都遠較日軍弱，但仍然奮勇抵抗18日，直到1941年12月25號香港島英軍最後防線逐漸瓦解，先至由時任香港總督楊慕琦決定投降，香港淪陷進入日佔時期。
1945年8月15號，日本廣播協會播放昭和天皇預錄嘅《終戰詔書》，日本接受中、英、美、蘇發出嘅《波茨坦公告》，無條件投降，第二次世界大戰結束，亦代表長達3年8個月嘅香港日佔時期終告結束。
同盟國、日本政府代表喺1945年9月2號簽署日本投降書之前，英國皇家海軍夏慤少將指揮嘅艦隊喺1945年8月30號率先駛入維多利亞港，宣告香港重光，英國恢復統治香港。
1946年，英屬香港政府將8月30號定為「光復紀念日」（後改譯做「重光紀念日」），並列入香港公眾假期，以紀念英國由1945年8月30號正式重新管治香港，並悼念香港保衞戰中為香港捐軀嘅將士。1968年，紀念日改定於8月第一個星期一及8月最後一個星期一。1983年，紀念日改定於8月最後一個星期一同埋之前一個星期六。
到1997年香港主權轉移，新嘅宗主國唔認同前人留落嘅紀念日，輾轉修改法例，取消香港「重光紀念日」嘅公眾假期地位。
然而，歷史並唔能夠因為政權同法律嘅改變而被人遺忘――縱使「重光紀念日」唔再係公眾假期，但近年由香港本地退役英兵組成嘅香港樂善會同埋香港軍事服務團協會都會喺8月最後一個星期日去到位於柴灣歌連臣角道嘅西灣國殤紀念墳場舉行香港「重光紀念日」紀念活動。
由於西灣國殤紀念墳場位於山上面，所以每逢「重光紀念日」紀念活動，香港樂善會都會安排穿梭巴士畀參加者來回筲箕灣巴士總站附近同西灣國殤紀念墳場。
2020年8月30號，香港樂善會同埋香港軍事服務團協會再次喺西灣國殤紀念墳場舉行香港「重光紀念日」紀念活動，朝早9點幾已經有義工喺筲箕灣寶文街準備，而一啲香港本地退役英兵亦互相檢查係咪已經穿戴整齊。
至於穿梭巴士呢~係佢：
車輛登記TK5979，係一架配捷聯JL010型車身嘅五十鈴LV434旅遊巴…總共開出2班：09:45、10:15。
因應近月新型冠狀病毒（武漢肺炎）全球肆虐，2020年香港「重光紀念日」紀念活動要改為「私人儀式」，參加者需要事前申領入場券，並且按主辦方指定時間分批乘搭旅遊巴。
所有參加者喺上旅遊巴前同埋進入西灣國殤紀念墳場前都需要檢查入場券、戴好口罩、測量體溫、用酒精搓手液捽吓雙手。
至於2020年香港「重光紀念日」紀念活動儀式，本身適逢係75週年，可惜亦拜新型冠狀病毒（武漢肺炎）所賜，一切從簡，重點只有恭讀禱文、敬獻花圈、全體默哀。
不過，雖然儀式從簡，但幾個同盟國家仍然派遣使節或者武裝部隊代表到場。
2020年香港「重光紀念日」紀念活動歷時大約只有半句鐘，未設公眾獻花。
儀式完結後，主辦方亦有安排返原架旅遊巴送參加者返去筲箕灣，又係總共開出2班：11:45、12:15。
但係返到落去寶文街，遇上路面左邊泊滿車，旅遊巴焗住要塞喺路中間畀乘客落車，引致交通受阻，後方司機齊齊「響長咹」…唉~
當政權肆意妄為咁篡改歷史，一架旅遊巴、兩程上、兩程落，除咗話係接載咗百幾個香港人上落西灣國殤紀念墳場之外，其實亦係接載咗一種堅守香港歷史嘅民情信念，代表住喺呢個大時代之中維護真相嘅一道防線。
Be the first to comment