汽總新巴分會2023兔年新春醒獅拜年活動

2023年1月24號農曆新年大年初三，汽車交通運輸業總工會新世界巴士分會（新巴分會）舉行咗新春醒獅拜年活動，當日朝早九點幾就喺柴灣巴士廠打響頭炮，匯達交通嘅高層亦都有到場同一眾員工歡度新年。

今次新巴分會租用咗城巴旗下嘅#26開篷雙層巴士巡迴到幾個巴士總站，巴士上面都有切合返今次活動嘅宣傳橫額以及新年裝飾。

接近中午時分，佢哋去到北角渡輪碼頭公共運輸交匯處（北角總站），恭候佢哋嘅包括有警方，警員循例抄低相關活動人員嘅資料，並且表示「新年最緊要大家開心，安安全全健健康康」。

最後醒獅隊就喺北角總站嘅站長室以及員工休息室舞動獅子，祈求喺新嘅一年為員工帶嚟好運。

喧鬧嘅鑼鼓聲響起之後，唔單止一眾在場嘅巴士業員工精神為之一振，連喺附近歡度假期嘅外傭都加入圍觀，一時間北角總站站長室附近人頭湧湧。

醒獅隊當然唔會忽視一直關照住各位員工嘅關二哥，醒獅都走咗入去員工休息室表演畀關二哥睇一睇啦！

至於喺北角總站側邊嘅北角渡輪碼頭，大家同樣都係公共交通從業員，醒獅隊當然都要為香港小輪集團嘅員工喺新年整返個好采頭！

醒獅首先走入去北角渡輪碼頭入面，行一個圈，希望為香港小輪嘅員工以及乘客帶嚟好運。

最後醒獅返返出去北角渡輪碼頭門外，完成「採青」項目，祝願大家萬事勝意。

醒獅隊喺北角渡輪碼頭表演期間，同樣吸引到唔少市民留意，醒獅就一路舞住獅返去北角總站，務求令到周圍嘅市民都有個開心嘅年初三。

除咗舞獅之外，新巴分會亦派出「財神」派利是，起碼都叫做有張「紅紙仔」喺入面啦！

巴士台亦喺度祝大家新年滿希望，闔家都安康！