公民黨立法會議員譚文豪2019年12月一直追問香港政府當局，自廣深港高速鐵路西九龍站啟用以嚟，有無發生過有人未經許可而進入路軌同隧道、有無發生過乘客未辦理入境手續就入咗香港境內…
運輸及房屋局延至2020年2月26號下晝先至以書面回應，指西九龍站乘客出入境檢查，以及站內香港口岸區保安工作，均屬保安局政策範疇，經諮詢保安局先至答覆立法會。
然而，政府當局嘅答覆卻令人錯愕…自2018年9月高鐵通車以嚟，曾經發生過2宗未獲授權人士進入高鐵路軌事件：
- 2019年3月底，港鐵公司1名月台助理喺西九龍站月台工作期間不慎墮軌。港方根據「一地兩檢」聯絡協調及應急處理機制，由香港消防處獲得中国許可經過中国口岸區協助事主。
- 2019年12月初某個夜晚，1名中国乘客由長沙南站搭南行列車，原本佢想喺深圳北站落車但錯過停站。當列車繼續行到香港西九龍站後，嗰名中国乘客落車，但無過關，並且走入路軌仲沿路軌自己行咗一段時間，去到路軌沿線其中一個通風大樓緊急出口，佢先至自己離開鐵路範圍，並向香港警方自首――嗰名中国乘客及後按機制被送去中国。
回覆指政府當局同埋港鐵公司喺高鐵營運同埋保安角度，都好關注上述事件，港鐵公司正繼續詳細調查。保安方面，港鐵公司會聯同保安局、執法機關仔細審視上述事件，並由港鐵公司連同執法機關採取適當跟進措施，以確保邊界完整性、避免同類事件發生。營運方面，運輸及房屋局亦正向港鐵公司跟進，確保高鐵營運安全同服務質素。
當日…2017年2月嘅時候，政府當局信誓旦旦話過乘客無可能落到去路軌…或許…以後全面封印廣深港高鐵成個系統先至可能解決到？
Be the first to comment