「中巴」「重返」柴灣廠 最後一刻闖一闖

當年中華汽車（中巴）掟咗1200幾萬蚊，喺柴灣道391號興建柴灣巴士廠，到1977年落成啟用，自此一直係中巴主要巴士車廠。

1998年中巴專營權被撤銷後，中巴保留柴灣巴士廠天台做自己公司總辦事處同停車場，但轉型搞地產嘅中巴就安排將巴士廠一路放租，一路諗著發展做商住項目。

去到2015年5月29日，中巴同太古合伙收購中巴柴灣車廠地皮，以2：8嘅權益分配方式發展地產項目。經政府相關部門批准、中巴同各租戶協調搬遷，中巴柴灣巴士廠將喺2020年初開始清拆。

當柴灣巴士廠面臨消失，一啲被有心人保留嘅前中巴巴士都陸續重返柴灣巴士廠留倩影。繼「水翼船」、「VA」、「珍寶」等之後，喺2019年12月29號朝早，前中巴都城嘉慕加長版兩軸「超級都城型」 雙層巴士MB5 (BY8149) 亦都返到柴灣巴士廠。

雖然有人話「做乜唔執靚返先至返去影相」，但其實，巴士廠同巴士呢一刻滄桑嘅外表，正正反映出中巴後期對香港巴士業嗰種態度。