隨著抗爭人士所定嘅時限屆滿，2019年12月9號朝早喺香港多處有身著黑衫黑褲戴口罩人士發起堵塞馬路以至干擾巴士嘅行動。
根據立場新聞所講，「大三罷」計劃由0600時開始，「十區開花」咁喺大埔、沙田、灣仔、屯門、荃灣、觀塘、深水埗、黃大仙、油尖旺同將軍澳行動。朝早個別地區出現交通阻塞，其中港鐵東鐵線沙田站有雜物跌落路軌，南行列車一度受阻。
至於道路方面，朝早近9點，旺角同藍田都有人試圖堵塞馬路。
其中喺旺角，彌敦道北行近亞皆老街路口，有等緊燈嘅公共巴士被不知名人士撳緊急死火掣，巴士車長需要落地處理，期間大批武裝部隊人員一度到場包圍巴士。
至於喺差唔多嘅時間，藍田啟田道有不知名人士向馬路拋出雜物，試圖堵塞馬路。
期間有公共巴士受阻，其後由武裝部隊人員到場清走障礙物，並拘捕在場人士。
為防止各區會持續出現堵塞馬路嘅情況，政府當局朝早派出大批蒙面武裝部隊人員喺各個主要區域加強巡邏， 根據蘋果日報報道，部分武裝部隊人員更加手持步槍，有市民表示對於呢種高姿態巡邏所引起嘅恐慌，遠比真係面對示威者更加嚴重。
Be the first to comment